Paralımpıada oıyndarynda qola júlde alǵan atyraýlyq paradzıýdoshylarǵa kólik berildi
Atyraý oblysynda múmkindigi shekteýli 1 367 adam sportpen shuǵyldanady. Onyń ishinde 16 parasportshy Parıj Paralımpıadasynda sporttyń birneshe túrinen – paradzıýdo, parataekvondo, voleıboldy otyryp oınaý, paraústel tennısi jáne parajeńil atletıkadan synǵa tústi.
Máselen, parataekvondodan Nurlan Dombaev pen parajeńil atletıkadan Gúlbaqyt Qaıyrjanova úzdik bestikke endi. Voleıboldy otyryp oınaýdan ulttyq quramanyń sapyna atyraýlyqtar Qýanysh Tájikov, Baýyrjan Sartaev, Perdebaı Namuratov, Aqylbek Shikibaev, Berik Іzmaǵanbetov, Janǵalı Súıeýov, Nurtaý Muqanbetqalıev pen Erlan Bıtemirov kirdi. Olar komandamen birge besinshi orynǵa ıe boldy. Paradzıýdodan baq synaǵan 5 paradzıýdoshynyń ekeýi – Zarına Raıfova men Jurqamyrza Shúkirbekov Paralımpıadanyń qola júldegeri atandy.
Oblys ákimi Serik Shápkenov XVII jazǵy paralımpıada oıyndarynyń júldegerleri men qatysýshylaryn sporttaǵy joǵary jetistigimen quttyqtady.
«Sizder Parıj Paralımpıadasyndaǵy jetistikterińizben jastarǵa úlgi kórsettińizder. Atyraý jurtshylyǵy da el namysy jolynda aıanbaı ter tógip, bıik maqsatqa kóz tikken ózderińizdi maqtan tutady. Alda alar asý bıik bolyp, júldelerińiz kóbeısin», - dedi Serik Shápkenov.
Ákim Atyraý sportyn damytýǵa úles qosyp júrgen sportshylarǵa Alǵys hat pen aqshalaı sertıfıkat tapsyrdy. «Infinity Eco Park» kompanııasy Parıj Paralımpıadasynyń qola júldegerleri Zarına Raıfova men Jurqamyrza Shúkirbekovke, olardyń bapkeri Jandos Qııanovqa «Zeekr» avtokóligin syıǵa tartty.
Eske sala ketelik, budan buryn atyraýlyqtar Parıj Olımpıadasynan oralǵan Ábıba men Esmıgúlge kólik syılaǵanyn jazǵan edik.