Parıjde jol talǵamaıtyn kólikter úshin aqyly turaq quny ósti

<p>ASTANA. KAZINFORM - Jeksenbi kúni Frantsııa astanasynyń turǵyndary úshin referendým uıymdastyrylyp, onda Parıjde jol talǵamaıtyn kólikterge arnalǵan turaq qunyn ósirý máselesi kóterildi.</p>

Onyń qorytyndysy boıynsha qala turǵyndarynyń kópshiligi (54,55%) «aýyr, qorshaǵan ortany lastaıtyn jeke kólikter turaǵy úshin arnaıy tarıf» qurýdy qoldady.
Daýys berýge 1,3 mln saılaýshy qatysty. Merııanyń habarlaýynsha, referendým saǵat 19:00-de aıaqtaldy.

Daýys berý kezinde jol talǵamaıtyn kólikterge (aǵylshynsha abbrevıatýrasy «Sport Utility Vehicle») nazar aýdaryldy. Bul sanatqa salmaǵy 1,6 tonnadan asatyn jáne jergilikti atqarýshy organdardyń arnaıy turaqqa ruqsaty joq kólikter kiredi.

Parıjdiń ortalyǵynda jol talǵamaıtyn kólikterdi turaqqa qoıý quny endi alǵashqy eki saǵatta saǵatyna 18 eýroǵa deıin kóteriledi. Shaǵyn kólikter úshin – saǵatyna 6 evro. Osydan keıin 4x4 ıelerine arnalǵan turaq tek qymbattaı túsedi.

Mysaly, jol talǵamaıtyn kóliktiń turaqqa alty saǵat qoıylý aqysy 225 eýro (110 myń teńgeden astam) bolmaq.

Parıjdiń syrtqy aýdandarynda saǵat 12:00-den 20:00-ge deıin jol talǵamaıtyn kólik júrgizýshisi alǵashqy eki saǵat úshin saǵatyna 12 eýro tóleıdi. Sodan keıin alty saǵattyq turaq úshin baǵa birtindep 150 eýroǵa deıin ósedi.

Osylaısha, Parıj meri A.Idalgo 2024 jylǵy Olımpıada oıyndaryna qaraı qaladaǵy aýanyń sapasyn jaqsartýǵa tyrysýda.