Parıjde kún qatty ysıyn dep tur

<p>ASTANA. KAZINFORM&mdash; Dúısenbi kúni úlken sport áýesqoılary olımpıada nysandary mańynda jáne Parıjdegi fan-aımaqtarda aptap ystyqtyń zardabyn tartty.</p>

Bul kúnderi aptap ystyq Frantsııanyń soltústigine, sonymen qatar, el astanasyna jetti.

Olımpıadanyń ashylý saltanaty kezinde jańbyr jaýyp, keıbir sharalardy keıinge qaldyrýǵa týra kelgenimen, sońǵy kúnderi aýa raıy jaqsardy.

Seısenbi kúni eń joǵary temperatýra 36°C-qa jetedi, dep habarlaıdy Meteo France.

Temperatýranyń kúrt kóterilýi oıyndarǵa qatysatyn sportshylarǵa ǵana emes, kórermenderge, týrısterge jáne Parıj turǵyndaryna da áser etýi múmkin.

Meteo France kún ysyǵan kezdi syrtqa kóp shyqpaýdy, sýdy kóp iship, basqa qalpaq kıip, sý búrikkish paıdalanyp júrýdi usyndy.

Parıjdiń aımaqtyq poıyzdary men metro operatory Île-de-France Mobilités dúısenbi kúni 70-ten astam temirjol stansalary men kólik jelisindegi aıaldamalarǵa, sondaı-aq avtovokzaldarǵa 2 mıllıon bótelke sý taratatynyn habarlady.

Bul bastama Olımpıada oıyndarynyń mıllıondaǵan kórermenderiniń suranysyn qanaǵattandyrý maqsatynda jasalmaqshy.