Parıjde Qazaqstan óńirlerine aýsyldan taza aımaq mártebesin berý máselesi qaralady

        QYZYLORDA. QazAqparat-Búgin Óńirlik kommýnıkatsııalar qyzmetinde oblystyq veterınarlyq baqylaý basqarmasynyń basshysy Ersultan Ápetov Kongo-Qyrym gemorragııalyq qyzbasynyń aldyn alý men  buralqy ıt-mysyqtardy aýlaý baǵytyndaǵy sharalardan habardar etti. 

Basqarma basshysy óńirdegi epızootııalyq jaǵdaıdyń barysy jaıly da málim etti, dep habarlady QazAqparat tilshisi.

    Mal arasynda túrli aýrýlar jıi-jıi beleń alyp turatyn Qyrǵyzstan, Ózbekstan memleketterimen shektesetin elimizdiń 5 oblysy Kedendik odaqtyń býferlik aımaǵyna kiredi.  Olardyń ishinde bizdiń de aımaq bar. Jyl basynan beri oblysta 2452,6 myń bas mal vaktsınalandy.

    «Qazir óńirde qaýipti ınfektsııalarǵa qatysty epızootııalyq jaǵdaı turaqty. Udaıy júrgizilip kele jatqan aldyn alý sharalarynyń arqasynda aımaqta aýsyl aýrýy tirkelgen joq. Jalpy, aldyn ala jasalǵan kestege oraı 15 túrli ınfektsııalyq aýrýǵa qarsy sharalar jasaldy», - dedi E.Ápetov.

    Basqarma basshysynyń sózinshe, aýsylǵa qatysty býferlik aımaqtan shyǵý úshin 239 myń bas sıyr,  438 myń usaq mal vaktsınalandy. Oblys aýmaǵynan shyǵatyn, sondaı-aq keletin túlik túrleri únemi baqylaýda tur.

  «Osydan eki aı buryn Halyqaralyq Epızootııalyq bıýronyń komıssııasy elimizdiń bes oblysyna vaktsına qoldanbaıtyn aýsyldan taza aımaq mártebesin berý máselesine qatysty ınspektsııa júrgizdi. Bul másele osy aıdyń sońynda Parıjde ótetin HEB otyrysynda sheshiledi»,  - dedi oblystyń bas veterınary.