Parıj polıtsııasy «eske alý sherýine» tyıym saldy
Aıta ketsek, 2016 jyly 19 shildede jandarmdar qýyp júrip ustaǵannan keıin 24 jastaǵy qara násildi er adam kóz jumǵan bolatyn. Uıymdastyrýshylar ony eske alý sharasyn jergilikti ýaqytpen saǵat 15:00-de Frantsııa astanasyndaǵy «Respýblıka» alańynda ótkizbek bolǵan.
Parıj polıtsııasy sherýge tyıym salynýyn 5 kúnge jalǵasqan tártipsizdikterden keıin qalpyna keltirý sharalarymen túsindiredi.
«Kóptegen uıymdar men toptardyń, sonymen birge ereýilge shyqqan qaýymdastyqtardyń osy mıtıngke qatysýǵa shaqyrýy kúsh qoldaný, ásirese tártip saqshylaryna qarsy kúsh kórsetý maqsatyndaǵy radıkaldy elementterdi týyndatýy múmkin», - dep málimdedi Parıj qalasy polıtsııasynyń prefektýrasy.
Alaıda, Frantsııanyń 90-ǵa jýyq «solshyl» saıası uıymy ózge «azamattyq sherýler» ótkizýge úndedi. Atap aıtqanda, LFI, EELV, CGT jáne Solidaires sııaqty jergilikti uıymdar men kásipodaqtar osy arqyly «muń men sherdi» bildirip, jumysshylar kvartaldaryn alalaıtyn saıasatty ózgertýdi talap etýge nıetti ekenderin málimdedi. Ásirese, polıtsııaǵa qatysty sharalar jyldam qabyldanýy kerektigin alǵa tartady.
«Polıtsııany túbegeıli reformalaý, onyń aralasý amaldaryn, qarýlanýyn, 2017 jyly qabyldanǵan atys qarýyn qoldanýdy jeńildetetin zańnyń kúshin joıý, ulttyq polıtsııanyń bas ınspektsııasyn taratyp, ony táýelsiz organmen almastyrý, jastarǵa qatysty alalaý máselelerimen aınalysatyn qyzmet qurý» - solshyl uıymdar osyndaı talaptar qoıyp otyr.
Eske salsaq, Frantsııada jasóspirim óliminen keıingi ereýilde ustalǵandar sany 421 jetken bolatyn. Munan soń 470-ten astam adam ustalǵany týraly aıtyldy.
Frantsııa Іshki ister mınıstrligi respýblıka aýmaǵynda tártipsizdikter toqtaǵanyn tirkedi. Bul týraly vedomstvo basshysy Jerald Darmanen Parlamenttiń joǵarǵy palatasynyń saıtynda kórsetilgen Senat tyńdalymynda málimdedi.