Parıj Olımpıadasyna daıyndyq: el sportshylaryna zamanaýı jabdyqtar berildi

ASTANA. QazAqparat – 2024 jyly Parıjde ótetin Olımpıadaǵa daıyndalý úshin qazaqstandyq sportshylarǵa zamanaýı jabdyqtar berildi. Bul týraly QazAqparat tilshisi Mádenıet jáne sport mınıstrliginiń baspasóz qyzmetine silteme jasap habarlaıdy.

Vedomstvo dereginshe, Parıj Olımıpıadasyna daıyndyq aıasynda arnaıy baǵdarlama ázirlengen. Oǵan saı, spotshylarǵa zamanaýı jabdyqtar satyp alýǵa qosymsha qarajat bólingen.

«2023 jyl – Olımpıadaǵa deıingi, ulttyq qurama komandalardy daıarlaý turǵysynan eń mańyzdy jyl. Іri jarystarda jeńiske jetý úshin, eń aldymen erik-jiger, tabandylyq, sporttyq rýh pen tártip qajet ekeni anyq. Biraq, ınfraqurylymnyń atqaratyn rólin esten shyǵarmaǵan jón. Sondyqtan, tıisti jaǵdaılardy jasaý úshin biz jabdyqtardy jańartý jáne satyp alý jumystaryn júrgizdik. Endi sońǵy nátıje tolyǵymen sportshyǵa baılanysty», - dedi Mádenıet jáne sport mınıstri Dáýren Abaev.

Sportshylarǵa 28 jazǵy jáne qysqy olımpıadalyq jáne 3 paralımpıadalyq sport túrleri boıynsha jabdyqtar berildi.

«Búginde kásibı sportshylar tehnologııamen qamtamasyz etilip otyr. Bul jerde jattyǵý protsesi, jarystar men demalys týraly aıtýǵa bolady. Degenmen, progress sonshalyqty tez bolǵandyqtan, jyl saıyn ártúrli jabdyqtar men jattyǵý quraldarynyń jetildirilgen modelderi paıda bolady. Sondyqtan, qazaqstandyq sportshylarǵa munyń bári qoljetimdi ekeni qýantady», - dep atap ótti short-trekten halyqaralyq dárejedegi sport sheberi Denıs Nıkısha.

Eske salaıyq, taıaýda mınıstr Dáýren Abaev federatsııa basshylarymen kezdesip, 2024 jyly Parıjde ótetin Olıpıadada joǵary nátıjege qol jetkizý úshin birqatar tapsyrma bergen bolatyn.

Foto: gov.kz