Parıj Olımpıadasynda qazaqstandyq tóreshiler de qazylyq etedi

<p>ASTANA. KAZINFORM &ndash; Búkil álem endi on kúnnen keıin Frantsııa astanasy Parıj qalasynda ótetin XXXIII jazǵy Olımpıada oıyndaryna kóz tikpek. Tórtjyldyqtyń basty dodasyna sportshylar qyzý daıyndyq ústinde. Al jer júzilik jarysta atletterden bólek biz nazar aýdaratyn taǵy bir mártebeli mamandar bar. Olar &ndash; tóreshiler.</p>

Parıj Olımpıadasynda tórelik etetin qazylar arasynda qazaqstandyq mamandar da joq emes. 
Búgin QR Ulttyq olımpıadalyq komıteti sol tóreshiler jaıynda derektermen bólisti.

QR Ulttyq olımpıadalyq komıtetiniń baspasóz qyzmeti taratqan málimet boıynsha, Qazaqstannan Parıj Olımpıadasynda 12 qazaqstandyq maman tórelik jasaıdy.

Olar: Alýa Bekturova (kórkem gımnastıka), Olga Soloveva (aýyr atletıka), Álııa Karımova (ártistik júzý), ıÝlııa Ignatchenko, Merýert Qaýkeeva (tennıs), Tımýr Ámirbekov (sporttyq gımnastıka), Evgenıı Dıakokın (semserlesý, sablıa), Evgenıı Mıheev (basketbol), Erik Jumabekov, Igor Lıgaı (kúres), Álisher Altaev, Ermek Súıenish (boks).

Foto: QR UOK

Olımpıada oıyndarynda tórelik etý úlken bilikti talap etedi. Odan bólek, halyqaralyq federatsııalar jazǵy oıyndarǵa baratyn ádil-qazylardy qatal irikteýden ótkizedi. Álemdik uıymnyń synaǵynan súrinbeı ótip, saıdyń tasyndaı iriktelgen mamandar ǵana eń mártebeli jarys – Olımpıada oıyndarynda qyzmet ete alady.

Endi sol tóreshilerimizdi qysqasha tanystyryp ótsek.

Qazaqstandyq tóreshi Tımýr Ámirbekov osymen óziniń tórtinshi Olımpıadasyna attanady. Sporttyq gımnastıkanyń has sheberi buǵan deıin 3 Olımpıada oıyndary men 18 álem chempıonatynda tórelik etken. Al Ámirbekov qazylyq jasaǵan Azııa chempıonattary men álem kýboginiń sanynda esep joq.

Kúres túrlerinen olımpıadalyq deńgeıdegi eki tóreshimiz jazǵy oıyndarda jumys isteıdi. Olar – Erik Jumabekov pen Igor Lıgaı.

Erik Jumabekov tórt álem chempıonatynda tórelik etken. Tájirıbeli maman Olımpıadada alǵash ret qazylyq jasaıdy. Ol 2019 jyly Astanada, 2021 jyly Osloda (Norvegııa), 2022-2023 jyldary Belgradta (Serbııa) ótken álem chempıonattarynda jáne 15-ke jýyq Azııa birinshiliginde tóreshilik mindetti abyroımen atqarǵan.

Foto: QR UOK

Al qazaqstandyq tóreshi Alýa Bekturova Parıj Olımpıadasynda kórkem gımnastıka sheberleriniń ónerine baǵalaýshy bolmaq. Bekturova kórkem gımnastıkadan Halyqaralyq sanattaǵy tóreshi. Ol jekeleı jáne toptyq jattyǵýdaǵy sportshylardyń ónerine tórelik etdi.

Alýa buǵan deıin Býenos-Aırestegi (2018) jasóspirimder Olımpıadasynda qazylyq jasap, Tokıo Olımpıadasyna rezervtegi tóreshi retinde shaqyrtylǵan. Ol búginge deıin álem chempıonattary men álem kýbogi kezeńderinde jumys istep keldi. Al Olımpıada oıyndarynda alǵash ret qazylyq jasamaqshy.

Foto: QR UOK

Qazaqstandyq maman sońǵy olımpıadalyq tsıklde, ıaǵnı, 2020-2024 jyldar aralyǵynda eki álem chempıonaty men álem kýboginiń barlyq kezeńinde tórelik etken.

Onyń ishinde, Ispanııanyń Valensııa qalasynda ótken lıtsenzııalyq álem birinshiligi de bar. Búginde Alýa Bekturova Parıj oıyndaryna toqtaýsyz daıyndalyp jatyr.