Parıj Olımpıadasyna 90-ǵa jýyq joldama alýdy kózdep otyrmyz - Elsııar Qanaǵatov
Bul týraly búgin Astanada ótken Qazaqstan Respýblıkasy Týrızm jáne sport mınıstrliginiń dene shynyqtyrý jáne sport, oıyn bıznesi men lotereıa qyzmetin retteý salalaryndaǵy 2023 jylǵy qyzmeti men 2024 jylǵa qoıylǵan negizgi mindetteri týraly keńeıtilgen Alqa májilisinde Olımpıada oıyndaryna daıyndyq jónindegi shtabtyń basshysy Elsııar Qanaǵatov málim etti.
«Qazirgi tańda Olımpıada oıyndarynyń joldamalaryna talasatyn 160-tan astam sportshy iriktelip, qyzý daıyndyq jumystaryn júrgizip jatyr. Maýsym aıynyń sońyna deıin 70-ke jýyq halyqaralyq irikteý týrnırlerine qatysyp, 90-ǵa jýyq lıtsenzııaǵa qol jetkizemiz dep josparlap otyrmyz», - dep atap ótti Qanaǵatov.
Sondaı-aq ol Olımpıada oıyndaryna daıyndyq jónindegi shtabtyń atqaryp jatqan jumysynyń basty baǵyttary týraly da atap ótti.
«Azııa oıyndarynyń júldegerlerin qabyldaý kezindegi Prezıdenttiń tapsyrmasyn oryndaý úshin Týrızm jáne sport mınıstriniń buıryǵymen qysqy Jasóspirimder Olımpıadasyna jáne jazǵy Olımpıada, Paralımpıadaǵa daıyndyq máselelerin úılestirý úshin Sportty damytý dırektsııasynyń, Ulttyq Olımpıada komıtetiniń jáne federatsııalardyń bilikti mamandarymen jasaqtalǵan arnaıy shtab quryldy. Qazirgi tańda shtab óziniń jumysyn jospar boıynsha atqarýda. Shtabtyń jumysy Jasóspirimder Olımpıadasyna daıyndyq máselelerin uıymdastyrýdan bastaldy. Osy keshendi jarysqa qatysý boıynsha Mınıstrliktiń, Ulttyq Olımpıada komıtetiniń, federatsııalardyń qoldaýymen barlyq jaǵdaı jasaldy. Sonyń arqasynda bizdiń sportshylarymyz jaqsy nátıje kórsetip Qazaq elin jaqsy jaǵynan dúnıe júzine tanyta bildi. Qazirgi tańda Shtab Parıj qalasynda (Frantsııa) ótetin 2024 jylǵy XXHIII (33) - jazǵy Olımpıada, XVII (17) Paralımpıada oıyndaryna ulttyq qurama komandalardy daıarlaýdy qamtamasyz etý boıynsha jumys atqaryp jatyr», - dedi shtab basshysy.
Aıta ketsek, elordadaǵy Alqa májilisinde mınıstr buqaralyq jáne olımpıadalyq sport túrlerin jetildirýde aýqymdy jumystar kútip turǵanyn aıtqan bolatyn. Sondaı-aq mınıstr sportshylardy daıarlaýdyń zamanaýı ınfraqurylymyn qurýdyń mańyzdylyǵyn atap ótken edi.