Parıj Olımpıadasy: Sanǵa emes, sapaǵa mán beriledi
Qazir Qazaqstan ulttyq quramasynyń qorjynynda sporttyń 8 túrinen 19 lıtsenzııa bar. Ázirge sadaq atýdan – 4, veloshosseden – 3, nysana kózdeýden – 5, qazirgi bessaıys pen bokstan eki-ekiden, grek-rım kúresi, erkin kúres pen sporttyq gımnastıkadan bir-bir joldama buıyrdy.
Ermek Marjyqpaevtyń aıtýynsha, bul kórsetkish Tokıo Olımpıadasymen salystyrǵanda tómen. Sol ýaqytta sportshylarymyz 30 joldamany jeńip alǵan.
– Aldaǵy ýaqytta áli 60-qa jýyq lıtsenzııalyq týrnır bar. Bul jarystarda sátti óner kórsetip, lıtsenzııalardyń sanyn 70-ten asyrý kózdelip otyr. Ásirese, aldaǵy kúnderi Italııada ótetin týrnırde boksshylarǵa zor senim artylýda. Jalpy, Tokıo Olımpıadasymen salystyrǵanda joldama sany az bolady. Biraq, biz sapaǵa mán berip otyrmyz, – dedi mınıstr.
Frantsııanyń Qazaqstandaǵy Tótenshe jáne Ókiletti Elshisi Dıde Kaness qazaqstandyq sportshylardyń Parıj Olımpıadasynda sátti óner kórsetýine tilektes ekenin aıtyp, Olımpıada boıtumaryn tabys etti.
– Parıj Olımpıadasy Frantsııa men Qazaqstan arasyndaǵy dostyq qarym-qatynasty nyǵaıta túsedi degen senimdemin. Buǵan deıin eki eldiń prezıdentteri kezdesip, yntymaqtastyqtyń jarqyn úlgisin kórsetken edi. Sport bolsyn, ózge de salalarda baıandy baılanys jalǵasa beretinine senim mol, – dedi elshi.
Ermek Marjyqpaev Qazaqstan men Frantsııa arasyndaǵy týrıstik aǵymdy odan ári ulǵaıtý úshin tikeleı reısterdi iske qosý jáne Qazaqstan azamattaryna týrıstik vızalar berý rásimin jeńildetý múmkindigin qarastyrýdy usyndy.
Aıta keteıik, Parıj Olımpıadasy 26 shilde men 11 tamyz aralyǵynda ótedi. Dúbirli dodaǵa álemniń 205 elinen 10 myńnan asa sportshy qatysady. Parıj tórinde 32 sport túrinen 329 medal jıyntyǵy sarapqa salynady.