Parıj Olımpıadasy: Qazaqstan delegatsııasy kók Týdy jelbiretti
Sherýdiń ereksheligi sol, delegatsııalar Sena ózenin qaıyqpen júzip ótti. Sportshylardy tasymaldaý úshin 80 qaıyq jumyldyrylǵanyn atap ótken jón.
Parıj Olımpıadasyna joldama alǵan 80 sportshynyń barlyǵy sherýde tóbe kórsetken joq. Sebebi keıbir jekelegen sport túrleri jarys kestesine sáıkes keıinirek bastalatyndyqtan Parıjge keshigip baratyn sportshylarymyz bar.
26 shildege deıin Frantsııa astanasyna tek akademııalyq eskek esý, sadaq atý, boks, nysana kózdeý, tennıs, ústel tennısi, sporttyq gımnastıka, semserlesý, júzý, badmınton, dzıýdo, tas joldaǵy velosport jáne stend atý sportynan óner kórsetetin sportshylarymyz ǵana baryp úlgerdi. Al olardyń sany 50 sportshy ǵana.
Jeńil atletıkadan qatysatyn otandastarymyz 29 shilde kúni Frantsııaǵa attanady. Alaıda Olga Safronova saltanatty sherýde tý ustaıtyndyqtan, ózgelerden birneshe kún erte bardy.
Al erkin kúres sheberleri tek 5 tamyzda ǵana Almatydan attansa, breıkıngten synǵa túsetin Amır Zakırov 8 tamyzda Parıjge jetedi.
Qaıyqpen júzip ótken ár eldiń delegatsııasyna qarap, sportshylardyń az-kóptigin shamalaýǵa bolatyny belgili. Osy rette, Parıj Olımpıadasynda AQSh-tyń sportshylary (592) kóp ekenin atap ótken jón.
Al, ekinshi oryn jarys qojaıyndarynyń enshisinde. Frantsııa 587 sportshysyna úmit artyp otyr. Úshinshi orynǵa Aýstralııa quramasy (468) jaıǵasqan. Qazaqstan namysyn 80 sportshy qorǵaıtyny belgili.
Esterińizge salsaq, buǵan deıin Almatyda Qazaqstan quramasyn Frantsııa astanasy Parıj qalasynda ótetin HHHІІІ jazǵy Olımpıadaǵa shyǵaryp salý rásimi ótken edi.