Parıj Olımpıadasy: Dúbirli doda bastaldy

<p>ASTANA. KAZINFORM &ndash; Frantsııa astanasy Parıj qalasynda XXXIII jazǵy Olımpıada oıyndary resmı túrde jalaýyn jelbiretti. 26 shilde men 11 tamyz aralyǵynda 205 eldiń 10 500 sportshysy 32 sport túrinen 329 medal jıyntyǵyn sarapqa salady. Olardyń qatarynda 80 otandasymyz bar.</p>

Parıj Olımpıadasynyń ashylý saltanaty jazǵy Olımpıada oıyndary tarıhynda tuńǵysh ret stadıonda emes, tabıǵat aıasynda, ıaǵnı Sena ózeniniń boıynda ótip jatyr. Osylaısha, frantsýzdar dúbirli doda bastalmaı jatyp Olımpıadanyń erekshelikterge toly bolatynyn uqtyrdy.

Foto: Vıdeodan alynǵan kadr

Buǵan deıin saltanatty rásimniń shoý-dýman jaǵyn basqarýshy maman Tonı Estange France Press aqparat agenttigine bergen suhbatynda: «sport merekesiniń ashylý saltanatyn ózende uıymdastyrý – stadıonda ótkizýge qaraǵanda anaǵurlym kúrdeli. Alaıda munyń kórermenge áseri múlde bólek bolatyny sózsiz. Biz úshin eń mańyzdysy osy», - degen edi.

Shynymen de, Parıj shaharyn qaq jaryp ótetin Sena ózeniniń boıynda uıymdastyrylǵan saltanatty ashylý rásimi kópshilikti erekshe sezimge bólep jatyr. Qos jaǵalaýǵa jınalǵan 500 myńǵa jýyq kórermen bylaı tursyn, teledıdardyń ar jaǵyndaǵy sport súıer qaýym «bárekeldi!» desip jatqany anyq.

Foto: vıdeodan kadr

Sálden soń sportshylar sherýinde ár delegatsııa jeke-jeke qaıyqpen ózen boıymen júrip ótedi. Sherý 6 shaqyrymǵa sozylyp, Trokaderonyń aldynda aıaqtalady. Onda saltanatty is-sharanyń qalǵan bóligi jáne shoý ótedi. 

Foto: vıdeodan kadr

Úsh saǵatqa sozylatyn ashylý saltanatyna 3 myńǵa jýyq bıshi, ánshi, artıst qatysady. Ashylý rásiminiń jartysynan astamy Kún shyǵyp turǵanda ótse, al qarańǵy túsken soń uıymdastyrýshylar ǵalamat jaryq shoýmen tańǵaldyrmaq. 

Foto: vıdeodan kadr

Esterińizge salsaq, buǵan deıin Parıj Olımpıadasynyń ashylý saltanatyna qansha qazaqstandyq qatysatynyn jazǵan edik.