Parıj Olımpıadanyń ashylý saltanatyna qalaı daıyndalyp jatyr
Polıtseıler men volonterlerdi qosa alǵanda 80 myńǵa jýyq adam qoǵamdyq tártipti qadaǵalap júr.
Al Sena ózeniniń jaǵalaýyndaǵy sportshylar sherýi ótetin aýmaqtarǵa ótý shektelgen. Tek arnaıy qyzmet ókilderi ǵana kirip-shyǵyp jatyr.
Qaladaǵy birshama metro beketteri jabyq tur.
Qazir bizde bar aqparat kózderine sensek, búgin Parıj aspanynan ushaqtardyń ushýyna da qatań tyıym salynǵan kórinedi.
Jalpy, 45 myń polıtseı, 10 myń sarbaz jáne 2 myń jeke kúzet qyzmetkeri Sena ózeninde, onyń jaǵalaýy men aınalasyndaǵy eskertkishter boıymen ótetin sherýdiń qaýipsizdigin qamtamasyz etpek.
Sebebi Jazǵy Olımpıada oıyndary tarıhynda alǵash ret ashylý saltanaty stadıonda emes, tabıǵat aıasynda, Sena ózeniniń boıynda ótpek.
Sportshylar sherýinde ár delegatsııa jeke-jeke qaıyqpen ózen boıymen júrip ótedi.
Sherý 6 shaqyrym joldy júrip ótip, Trokaderonyń aldynda aıaqtalady. Onda saltanatty is-sharanyń qalǵan bóligi jáne shoý ótedi.
Saltanatty sharany elimizdiń jankúıerleri tuńǵysh ret bes birdeı telearnadan tikeleı efırde kóre alady.
Olar — Qazaqstan, Qazsport, «Habar», «El arna» jáne Jibek Joly telearnalary. Osy atalǵan bes arna oıynnyń resmı ashylý saltanatyn birdeı ýaqytta tikeleı efırde kórsetedi.
Esterińizge sala ketsek, Olımpıada oıyndarynyń ashylý saltanatynda elimizdiń kók baıraǵyn Qazaqstan quramasynyń kapıtany, boksshy Aslanbek Shymbergenov pen jeńil atlet Olga Safronova ustap shyǵady.
Frantsııa astanasy XXXIII jazǵy Olımpıada oıyndary 26 shilde men 11 tamyz aralyǵynda ótedi.
Oǵan álemniń 205 elinen 10 500 sportshy qatysady.