Parıj maǵan Olımpıadanyń qandaı jarys ekenin uǵyndyrdy – Ábıba Ábýjaqynova

<p>PARIJ. KAZINFORM &ndash; Frantsııa astanasy Parıj qalasynda ótip jatqan Olımpıada oıyndarynda búgin dzıýdodan aralas komandalyq beldesýler ótken bolatyn.</p>

Atalǵan jarysta Qazaqstan quramasy Brazılııaǵa 4:2 esebimen jol berdi. Beldesýlerden keıin Kazinform tilshisi Ábıba Ábýjaqynovamen tildesti. 

– Ábıba, aralas komandalyq saıysta úsh qyz shyǵyp, úsheýińiz de jeńilip qaldyńyzdar. Qarsylastaryńyz óte myqty boldy ma?

– Árıne, myqty komandamen synǵa tústik. Qazaqstan dzıýdodan Olımpıada tarıhynda alǵash ret komandalyq jarysta baq synap tur. Sondaı-aq lıtsenzııany tolyq qurammen almadyq qoı. Sondyqtan kópshiligimiz ózimizdiń salmaǵymyzdan joǵary balýandarmen beldestik.

– Eger qyzdarymyz jeńiske jetkende kelesi aınalymǵa óte alar ma edik?

– Bári múmkin edi. Ókinishke qaraı úsheýimiz de jeńildik. Jigitterdiń ekeýi jeńiske jetti. Barymyzdy salyp beldestik. Alaıda júldege qol soza almadyq. Eger tolyq qurammen kelgende basqasha bolar ma edi.

– Osymen qazaq dzıýdoshylary Olımpıada oıyndaryn aıaqtady. Atalǵan dodadaǵy kórsetkishterińizge razy boldyńyzdar ma?

– Árıne, jigitterimiz jekeleı synda 1 altyn, 1 qola medal ıelendi. Bir sport túrinen alǵanda jaqsy nátıje. Júldeger atanǵan jigitterimizdi shyn júrekten quttyqtaımyn. Bul bizdiń dzıýdoshylardyń ortaq júldesi dep esepteımin.

– Al, ózińiz júldege «synyq súıem» qalǵanda súrindińiz. Qazirgi kóńil kúıińiz qalaı?

– Parıjge júlde alamyn dep kelgenim ras. Máńgi esimnen ketpeıtin ókinish qaldy. Moıyndaý kerek, aqtalmaımyn, jeńilip qaldym. Jankúıerlerdi qýanta almaǵanym úshin taǵy bir márte keshirim suraımyn. Eń bastysy – bul Olımpıada maǵan eń úlken tájirıbe syılady. Men mundaı dodaǵa birinshi ret qatysyp turmyn. Parıj maǵan Olımpıadanyń qandaı jarys ekenin uǵyndyrdy. 

– Elge qashan qaıtasyzdar?

– Buıyrsa, erteń jolǵa shyǵyp, 5 tamyz kúni elge jetemiz dep josparlap otyrmyz.

– Áńgimeńizge rahmet. Aldaǵy jarystarda sáttilik tileımiz.