2019 jylǵy órtten keıin alǵash ret Parıj Qudaı ana soborynyń qońyraýlary soǵyldy

<p>ASTANA. KAZINFORM &mdash; Ǵımarattyń Soltústik munarasyndaǵy segiz qońyraýdyń dybysy sobor 8 jeltoqsanda kópshilikke esigin ashqanǵa deıin estildi, dep habarlaıdy Kazinform agenttigi <a href="https://www.france24.com/en/europe/20241108-bells-notre-dame-cathedral-ring-first-time-since-2019-fire" target="_blank" rel="noopener">France24</a>-ke silteme jasap.</p>

AFP habarlaǵandaı, qońyraý juma kúni soǵyldy. Bul tarıhı eskertkishti qalpyna keltirý jolyndaǵy mańyzdy qadam boldy.

— Bul ádemi, mańyzdy jáne sımvolıkalyq sát, — dep atap ótti sobordy qalpyna keltirýge jaýapty memlekettik organnyń basshysy Fılıpp Jost.

2019 jyldyń 15 sáýirine qaraǵan túni parıjdiktermen qosa, búkil álem sobordyń tóbesi men shatyrynyń bir bóligin órt sharpyp, qıratyp jatqanyn baqylady. Prezıdent Emmanýel Makron tez arada Notr-Damdy bes jyl ishinde qalpyna keltirip, ony burynǵydan da «ádemi» etý mindetin qoıdy.

Osy mańyzdy mindetti júzege asyrý úshin 250-ge jýyq kompanııa men júzdegen mamandar jumyldyryldy, al jóndeý jumystarynyń quny júzdegen mıllıon eýrony qurady.

Qońyraýlar tańǵy saǵat 10:30 shamasynda soǵyldy (09:30 GMT). Segiz qońyraýdyń árqaısysy bir kún buryn jeke tekserildi, sodan keıin olar shamamen bes mınýt ishinde biraýyzdan shyryldady.

— Biz bárimiz kúshti emotsııalardy bastan ótkerdik. Búgin, 8 qarashada Notr-Dam bizge «Men osyndamyn, men seni kútemin» deıdi, — dedi Sobordyń prorektory Gııom Norman.

Onyń sózinshe, bul dybystar «qýanysh sıgnaly» ispettes.

2019 jylǵy órt Soltústik qońyraý munarasynyń bir bóligin qıratyp, ony qalpyna keltirýge týra keldi. Qońyraýlar alynyp, shań men qorǵasynnan tazartyldy, sodan keıin olar ornyna qaıtaryldy. Eń aýyr qońyraý, «Jábireıil», salmaǵy tórt tonnadan asady, al eń jeńili «Jan-Marı» — 800 keli.

7 jáne 8 jeltoqsanda sobordyń qaıta ashylýyna oraı saltanatty rásimder ótedi. Іs-sharanyń egjeı-tegjeıli baǵdarlamasy áli ashylmaǵanymen, Fılıpp Jost RTL-ge sobordyń mártebesine sáıkes keletin álemdik juldyzdardyń qoıylymdary kútiletinin aıtty.

Qalpyna keltirilgennen keıin Notr-Dam jyl saıyn 14-ten 15 mıllıonǵa deıin kelýshilerdi qabyldaıdy dep kútilýde.