Parıj qor naryǵy Eýropada kósh bastady

LONDON. QazAqparat – Ulybrıtanııada jalǵasyp jatqan ekonomıkalyq quldyraý men saıası belgisizdikke baılanysty Parıj Eýropadaǵy eń úlken qor naryǵyna aınaldy, dep habarlaıdy QazAqparat menshikti tilshisi.

Bloomberg agenttigi jınaǵan málimetterge sáıkes, Frantsııanyń qor naryǵy dúısenbide 2,823 trln dollardy qurap, brıtandyqtardan (2,821 trln dollar) sál ozyp ketti. 2016 jyly London qor bırjasynda tirkelgen kompanııalardyń aktsııalary frantsýzdyq básekelesterinen jalpy alǵanda 1,5 trıllıon dollarǵa artyq baǵalandy, al 2014 jyly olar shamamen 2 trıllıon dollardy quraǵan bolatyn.

Parıjdiń Eýropadaǵy eń iri qor naryǵyna aınalýyna dollarǵa qatysty fýnt sterlıngtiń tómendeýi, Ulybrıtanııa ekonomıkasynyń quldyraýy, Brıtan úkimetiniń naqty ekonomıkalyq strategııasynyń bolmaýy jáne yqtımal retsessııa yqpal etti. London qor bırjasynda usynylǵan ortasha kompanııalardy qamtıtyn FTSE-250 ındeksi ótken jyly shamamen 17%-ǵa tómendedi. Bul kóbinese brıtandyqtardyń shyǵynnyń azaıýyna jáne Ulybrıtanııa kásiporyndary shyǵynynyń ósýine baılanysty.

Sonymen qatar Parıj qor bırjasy jyl basynan beri koronavırýsqa qarsy shekteýler jeńildetilgennen keıin Qytaıdan suranystyń artýyna baılanysty iri sándi taýarlar óndirýshilerdiń qunynyń ósýin baıqap otyr. Louis Vuitton, Christian Dior jáne Bulgari sııaqty sán brendterine ıelik etetin LVMH frantsýz korporatsııasynyń aktsııalary sońǵy alty aıda 22%-ǵa, al Hermès aktsııalary 37%-ǵa ósti.

Foto: shutterstock.com