Parıj áýejaıynda 18 jyl ómir súrgen ırandyq qaıtys boldy

ASTANA. QazAqparat – Parıjdegi Sharl de Goll áýejaıynyń ǵımaratynda 18 jyl turǵan ırandyq Mahran Karımı Nasserı qaıtys boldy. Onyń oqıǵasy jelisimen Stıven Spılberg «Termınal» fılmin túsirgen, dep habarlaıdy QazAqparat VVS agenttigine silteme jasap.

Áýejaı ókiliniń málimetinshe, Nasserı senbi kúni túske deıin 2F termınalynda tabıǵı sebepterge baılanysty kóz jumǵan.

1945 jyly Irannyń Hýzestan provıntsııasynda týǵan Nasserı 1988 jyly Eýropaǵa ketken anasynyń artynan izdep barǵan. Alaıda ol kóshi-qon zańnamasyn oryndamaǵan.

Sodan keıin qajetti qujattary bolmaǵandyqtan ony Ulybrıtanııadan, Nıderland pen Germanııadan shyǵaryp jibergen. Nasserı áýejaıdy baspanalaýǵa májbúr bolǵan. Frantsııaǵa kirýge de quqyǵy bolmady.

Ol 2F termınalyndaǵy birneshe oryndyqqa jaıǵasty. Kúndiz óz ómiri týraly qoıyn dápterine jazyp, gazet-jýrnal oqýmen ýaqyt ótkizdi.

Nasserıdiń oqıǵasy álemdik BAQ jáne gollıvýd rejısseri Stıven Spılbergtiń nazaryn aýdardy. Onyń jelisi boıynsha Tom Henks pen Ketrın Zeta Djons oınaıtyn «Termınal» fılmin túsirdi.

Fılm premerasynan keıin Nasserıden kóp jýrnalıster ıntervıý aldy.

1999 jyly Frantsııa bosqyn mártebesin berse de, ol 2006 jylǵa deıin áýejaıda ómir súrdi. 2006 jyly aýrýyna baılanysty aýrýhanaǵa jatqyzyldy. Keıin ol fılmnen túsken aqshaǵa hostelde turdy.

Birneshe apta buryn Nasserı 2F termınalyna qaıta kelip, sonda kóz jumdy. Onyń qaltasynan birneshe myń eýro tabyldy, dedi áýejaı ókili.

Foto: Getty Images