Parıj-2024: Taekvondoshylardyń alǵashqy qarsylasy anyqtaldy

<p>PARIJ. KAZINFORM &mdash; Frantsııa astanasy Parıj qalasynda ótip jatqan Olımpıada oıyndarynda el namysyn qorǵaıtyn qazaq taekvondoshylarynyń alǵashqy qarsylasy belgili boldy.</p>

Atap aıtsaq, 58 keli salmaqta Samırhon Ababakırov alǵashqy aınalymda Vıto Dell'akvılamen (Italııa) kim myqtyny anyqtaıdy. Samırhon – G1 týrnırleriniń birneshe dúrkin jeńimpazy, Qazaqstan Kýbogy men VI jazǵy Spartakıadanyń jeńimpazy.

Jeke bapkeri – Nursultan Mamaev. Vıto – osy salmaqta Tokıo Olımpıadasynyń chempıony, álem chempıonatynyń jeńimpazy jáne qola júldegeri, Eýropa chempıony, Gran-prı týrnırleriniń chempıony.

80 keli salmaqta el namysyn qorǵaıtyn Batyrhan Tóleýǵalı Malı sportshysy Ismael Kýlıbalımen synǵa túsedi. Qarsylasy – álem chempıonatynyń 2 dúrkin qola júldegeri.

Aıta ketsek, Batyrhan Tóleýǵalı Qazaqstannan Parıj olımpıadasyna joldama jeńip alǵan eń jas sportshynyń biri. Ol bıyl 18 jasqa endi tolyp otyr.

Esterińizge sala keteıik, Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi. Oıynǵa álemniń 205 elinen 10 500 sportshy qatysyp jatyr.

Olımpıadashylar 32 sport túrinen 329 medal jıyntyǵyn sarapqa salyp jatyr.