Parıj-2024: Olımpıadanyń ashylý saltanatyna qansha sportshymyz qatysady
QR Sportty damytý dırektsııasynyń baspasóz qyzmeti málim etkendeı, Olımpıada oıyndaryna qatysatyn 80 sportshymyzdyń barlyǵy 26 shilde kúni ótetin ashylý saltanatyna bara almaıdy.
Oǵan sebep, keıbir jekelegen sport túrleri jarys kestesine sáıkes keıinirek bastalatyndyqtan Parıjge de keshigip baratyn sportshylarymyz bar. Sol sebepti barlyǵy atalǵan saltanatty sharaǵa qatysa almaıdy.
26 shildege deıin Frantsııa astanasyna tek akademııalyq eskek esý, sadaq atý, boks, nysana kózdeý, tennıs, ústel tennısi, sporttyq gımnastıka, semserlesý, júzý, badmınton, dzıýdo, tas joldaǵy velosport jáne stend atý sportynan óner kórsetetin sportshylarymyz ǵana baryp úlgeredi. Al onyń sany 50 sportshyny ǵana quraıdy.
Jeńil atletıkadan qatysatyn otandastarymyz 29 shilde kúni Frantsııaǵa attanady. Alaıda Olga Safronova saltanatty sherýde tý ustaıtyndyqtan, ózgelerden birneshe kún erte barady.
Al, erkin kúres sheberleri tek 5 tamyzda ǵana Almatydan attansa, breıkıngten synǵa túsetin Amır Zakırov 8 tamyzda Parıjge jetedi.
Keri baǵytta elimizge birinshi bolyp, 4 tamyz kúni akademııalyq eskek esý men dzıýdodaǵy sportshylarymyz oralady.
Esterińizge sala keteıik, Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.