Parıj-2024: Qyrǵyz boksshysyna sekýndant bolǵan ózbekstandyq jattyqtyrýshy marapattaldy

<p>PARIJ. KAZINFORM &ndash; Parıjdegi Olımpıada oıyndarynda qyrǵyz boksshysyna kómektesken ózbek bapkeri marapattaldy. Osy eńbegi úshin kórshi eldiń halyqaralyq qoǵamdyq birlestigi Akmal Hasanovty &laquo;Shyńǵys Aıtmatov&raquo; medalimen marapattady, dep habarlaıdy <a href="https://24.kg/sport/301302_uzbekskogo_trenera_kotoryiy_pomog_munarbeku_seyitbek_uulu_nagradili_medalyu/" target="_blank" rel="noopener">24.kg</a>.</p>

«Shyńǵys Aıtmatov Ystyqkól forýmy» halyqaralyq qoǵamdyq birlestiginiń bas hatshysy Assol Moldokmatova ózbek bapkerin «adamgershiliktiń, toleranttylyqtyń jáne qoǵamdyq dıplomatııanyń joǵary deńgeıi úshin» marapattaý týraly sheshim 5 tamyzda qabyldanǵanyn habarlady.

– Adamgershiligi, baýyrmaldyǵy úshin Akmalǵa rahmet. Biz ony baǵalaımyz, qurmetteımiz. Sizdiń (Qyrǵyzstanǵa) kelýińizdi asyǵa kútemiz. Siz barlyq maqtaý men marapattarǵa laıyqsyz, – dedi ol.

Aıta keteıik, 4 tamyzǵa qaraǵan túni qyrǵyz boksshysy Mýnarbek Seııtbek Ýýlý Parıjde ótip jatqan jazǵy Olımpıada oıyndarynda amerıkalyq Harvı Djamalǵa qarsy shırek fınaldyq kezdesý ótkizip, jartylaı fınalǵa shyqqan bolatyn. Jekpe-jek barysynda oǵan Ózbekstan delegatsııasynan kelgen bapker Akmal Hasanov sekýndant boldy.

Jekpe-jekti Mýnarbektiń jeke bapkeri Beganas Sultanbaev ekrannan tamashalady. Jelilerde taraǵan aqparatqa qaraǵanda, Mýnarbektiń jeke jattyqtyrýshysy Beganas Sultanbaev akkredıtatsııa máselesine baılanysty Parıjge bara almaǵan.