PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda búgin taekvondodan 58 keli salmaqta óner kórsetken qazaqstandyq Samırhon Ababakırov alǵashqy aıqasynda ıtalııalyq Tokıo olımpıadasynyń chempıony Vıto Del’Akvılamen kezdesýde jeńilip qaldy.
Alǵashqy kezeńde 12:6 esebimen basymdyq tanytqan Samırhon sońǵy eki kezeńde qarsylasyna kútpegen jerden ese jiberip aldy.
Eger, Ababakırovtiń qarsylasy fınalǵa shyǵyp jatsa, jubanysh beldesýine qatysý múmkindigin alady.
Aıta keteıik, búgin grek-rım kúresinen 87 keli salmaqta baq synaǵan qazaqstandyq balýan Nursultan Tursynov shırek fınalda ýkraınalyq Jan Belenıýkpen beldesip, 3:7 esebimen utylyp qaldy.
Sonymen qatar, keshe 77 kelide el namysyn qorǵaǵan Demeý Jadyraev Parıj Olımpıadasynyń jartylaı fınalynda Ázirbaıjan ókili Sanan Sýleımanovty aıqyn basymdyqpen utyp, Olımpıada oıyndarynyń fınalyna shyqqan edi.
Kúnsultan Otarbaı
Eýrazııa Ulttyq ýnıversıtetiniń túlegi. Respýblıkalyq «Qazaq sporty», «Sport» gazetterinde qyzmet atqarǵan.
2014 jylǵy Sochı, 2016 jylǵy Rıo-De Janeıro, 2017 jylǵy Inchhon jáne 2024 jylǵy Parıj Olımpıadasynda, sonymen qatar bir qansha Qysqy jáne Jazǵy Azııa oıyndarynan, álem birinshilikterine baryp tikeleı habar taratqan jýrnalıst.
Seıdaqmet Berdiqulov atyndaǵy arnaıy syılyqtyń laýreaty.