Parıj-2024: Demeý Jadyraev jartylaı fınalda kimmen beldesedi

<p>PARIJ. KAZINFORM &ndash; Frantsııa astanasy Parıj qalasynda ótip jatqan Olımpıada oıyndarynda Demeý Jadyraev grek-rım kúresinen jartylaı fınalda ázerbaıjan jigiti Sanan Sýleımanovpen beldesedi.&nbsp;</p>

Sýleımanov 2022, 2023 jyldardaǵy álem chempıonatynyń kúmis júldegeri, 2020 jylǵy Eýropa chempıonatynyń jeńimpazy. Ol bıyl 27 jasqa tolyp otyr.

Al 77 keli salmaqta óner kórsetetin Demeý bıyl 34 jasta. 2017 jylǵy álem chempıonatynyń kúmis júldegeri. Azııa chempıonatynda birneshe márte júldeger atanǵan sportshy. Byltyrǵy álem chempıonatynda Sanan Demeýden 5:1 esebimen basym túsken edi. Mine, endi oǵan Parıj tórinde ese qaıtarýǵa jaqsy múmkindik týyp otyr.

Esterińizge sala keteıik, Demeý Jadyraev shırek fınalda eki dúrkin álem chempıony, Tokıo oıyndarynyń kúmis júldegeri qyrǵyzstandyq Aqjol Mahmýdovpen beldesip, 3:1 esebimen basym tústi. Osylaısha Demeý Jadyraev Olımpıada oıyndarynyń jartylaı fınalyna shyqty.

Endi sanaýly sátterden keıin ol jartylaı fınalda synǵa túsedi. Fınaldyq kezdesýler 7 tamyzǵa josparlanǵan.

Aıta ketsek, grek-rım kúresinen el quramasynda Demeýden basqa Aıdos Sultanǵalı (60 keli), Álimjan Syzdyqov (130 keli), Nursultan Tursynov (87 keli) bar.

5 tamyzda Aıdos Sultanǵalı alǵashqy beldesýinde Qyrǵyzstan myqtysy Jolaman Sharshanbekovke ese jiberdi.

Al Álimjan Syzdyqov aldymen rýmynııalyq Alın Aleksýs-Tsıýrarıýden basym túsip, odan keıin ázerbaıjandyq Sabah Sharıatıden utyldy.

Sondaı-aq, Parıj Olımpıadasynda erkin kúresten Azamat Dáýletbekov (86 keli), Álisher Erǵalı (97 keli) jáne ıÝsýp Batyrmyrzaev (125 keli) el namysyn qorǵaıdy.

Kúres túrlerinen jarystar 5-11 tamyz aralyǵynda ótedi.