Parasportshy Zúlfııa Ǵabıdýllına múmkindigi shekteýli balalarmen kezdesti

TARAZ. QazAqparat – Tarazda «100 jańa esim» jobasynyń jeńimpazy, júzýden QR eńbek sińirgen sport sheberi, 14 dúrkin álem rekordyn jańartýshy, el tarıhynda tuńǵysh ret Paralımpıada oıyndarynyń jeńimpazy atanǵan Zúlfııa Ǵabıdýllına múmkindigi shekteýli balalarmen kezdesti, dep habarlaıdy QazAqparat tilshisi.

Kezdesýdi Jambyl oblysy ákimi apparatynyń «Qoǵamdyq kelisim» KMM-de Taraz qalasy ákimdiginiń jumyspen qamtý jáne áleýmettik baǵdarlamalar bólimi uıymdastyrǵan. Oǵan múmkindigi shekteýli balalar men olardyń ata-analary, estýinde aqaýy bar «Meıirim» mektep-ınternatynyń jáne «Bolashaq» mektep-ınternatynyń balalary qatysty.

Іs-shara barysynda joba jeńimpazy Zúlfııa Ǵabıdýllına óziniń jetistikke jetý jolyndaǵy ómir tarıhy, ómirlik ustanymdary týraly oılaryn ortaǵa saldy.

Aıta keteıik, bıyl «Qazaqstannyń kıeli jerleriniń geografııasy» jobasy bastaý alyp, joba aıasynda 30 erekshe balany qamtý kózdelip otyr. Jobanyń maqsaty – balalarǵa óńirimizdiń kıeli jerleri týraly maǵlumat berý, jas urpaqtyń boıynda týǵan jerine degen súıispenshiligi men qazaqstandyq patrıotızm sezimin arttyrý, tarıhı jáne mádenı eskertkishterdi, kıeli jerlerdi tanymal etý.

Kezdesý barysynda shaǵyn kontserttik baǵdarlama ótkizilip, shara sońynda «Biz birgemiz» eriktiler qoǵamynyń qoldaýymen «Astana cinema» kınoteatrynda mýltıplıkatsııalyq fılmderdi tamashalap, tátti bálishter men sýsyndardan dám tatty.