«Parasat joly» ortalyqtary ulttyq mádenıetti ilgeriletýge yqpal etedi – mınıstr
«Ózderińiz biletindeı, búgingi is-shara «Adaldyq alańy» jobasy aıasynda elimizdiń barlyq óńirindegi oblystyq kitaphana bazasynda «Parasat joly» óńirlik ortalyqtaryn ashýǵa arnalǵan.
Men óz sózimdi el Prezıdenti Qasym-Jomart Kemeluly Toqaevtyń «Táýelsizdik bárinen qymbat» atty maqalasyndaǵy «Egemendigimizdiń máńgilik úshtaǵany – Altaıdan Atyraýǵa, Alataýdan Arqaǵa deıin keń kósilgen baıtaq jerimiz, ananyń aq sútimen boıymyzǵa daryǵan qasterli tilimiz jáne barlyq qıyndyqtan halqymyzdy súrindirmeı alyp kele jatqan bereke-birligimiz. Biz osy úsh qundylyqty kózdiń qarashyǵyndaı saqtaımyz» degen úzindimen bastaǵym keledi.
Bizdiń maqsatymyz – keıingi urpaqqa qýatty ekonomıkasy men berik rýhanı-adamgershilik negizi qalyptasqan memleketti qaldyrý», - deıdi QR Mádenıet jáne sport mınıstri Aqtoty Raıymqulova.
Onyń aıtýynsha, búginge deıin «Adaldyq alańy» jobasy aıasynda Mádenıet jáne sport mınıstrligi aýyz toltyryp aıtarlyqtaı jumys istedi.
«2019 jyly qarasha aıynda iske qosylǵan jobalyq keńse Mınıstrlikte jáne barlyq baǵynysty mekemede sybaılas jemqorlyqqa qarsy is-qımyl men onyń aldyn alýǵa baǵyttalǵan qyzmetti qyzý júrgizip jatyr. Jobalyq keńse qyzmetkerleri jumysy barysynda sybaılas jemqorlyqqa qarsy is-qımyl agenttigimen tyǵyz qarym qatynas ornatty», - deıdi ol.
Qazirgi ýaqytta agenttik qyzmetkerleriniń kómegimen Mınıstrlikke baǵynysty uıymdar bazasynda sybaılas jemqorlyqqa qarsy aýdıt, Aqparat jáne qoǵamdyq damý mınıstrligimen birlesip áleýmettik beınerolıkter daıyndaý sııaqty birqatar is-shara ótkizildi.
«Bıyl 8 qańtarda Ulttyq akademııalyq kitaphanada ashylǵan «Parasat joly» jańa ortalyǵy - «Adaldyq alańy» jobalyq keńsesi men QR Sybaılas jemqorlyqqa qarsy is-qımyl agenttigi arasyndaǵy tyǵyz is-qımyldyń kezekti nátıjesi.
Endi, mine, búgin biz elimizdiń barlyq óńirindegi oblystyq kitaphana bazasynda «Parasat joly» óńirlik ortalyqtarynyń ashylýyna qatysyp otyrmyz. Jańa ortalyqtardyń jumysy adaldyq, parasattylyq qaǵıdattaryn qalyptastyrýǵa, ulttyq mádenıet pen rýhanııat qundylyqtaryn ilgeriletýge yqpal etedi dep úmittenemin», - deıdi mınıstr.
Budan bólek, búgin Sybaılas jemqorlyqqa qarsy is-qımyl agenttigi men Mádenıet jáne sport mınıstrligi arasynda Ózara yntymaqtastyq týraly memorandýmǵa qol qoıylady. Memorandýmnyń maqsaty – azamattyq qoǵamda sybaılas jemqorlyqqa qarsy is-qımyl máseleleri boıynsha ózara yntymaqtastyqty nyǵaıtý, parasattylyq ıdeologııasyn ilgeriletý jáne kez kelgen sybaılas jemqorlyq áreketterine múldem tózbeýshilikti qalyptastyrý.