Parany talap etkeni úshin jaza: Qylmystyq kodekske jańa bap engizilmek
«Memlekettik fýnktsııalardy oryndaýǵa ýákilettik berilgen adamnyń ne oǵan teńestirilgen adamnyń nemese jaýapty memlekettik laýazymdy atqaratyn adamnyń ne laýazymdy adamnyń, sol sııaqty shet memlekettiń nemese halyqaralyq uıymnyń laýazymdy adamynyń para berýshiniń nemese ol ókildik etetin adamdardyń paıdasyna jasaǵan áreketteri (áreketsizdigi) úshin ózine nemese basqa adamdarǵa parany suraýy nemese talap etýi – belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, 2 000 AEK-ke (6 900 000 myń teńge) deıin aıyppul salýǵa ne sol mólsherde 600 saǵatqa deıin qoǵamdyq jumystarǵa tartýǵa ne 2 jylǵa deıin bas bostandyǵyn shekteýge ne sol merzimge bas bostandyǵynan aıyrýǵa jazalanady», - delingen Ashyq NQA portalynda jarııalanǵan kodekstiń jańa redaktsııasynda.
Alaıda, para talap etken adam óziniń áreketi týraly quqyq qorǵaý organdary muny áshkerelemeı turyp habarlasa, jazaǵa tartylmaıdy.
«Para berý ótinishin nemese talabyn bildirgen adam, eger ol quqyq qorǵaý organyna nemese arnaýly memlekettik organǵa osy fakti týraly atalǵan organdarǵa málim bolǵanǵa deıin parany suraǵany nemese talap etkeni týraly óz erkimen habarlasa, qylmystyq jaýaptylyqtan bosatylady», - delingen qujatta.
Aıta keteıik, qoldanystaǵy Qylmystyq kodekste mundaı bap joq.
«Bizdiń oıymyzsha, «para suraý» jáne «para talap etý» birdeı uǵym emes, biraq ekeýi de qoǵamdyq teris sıpatqa ıe. Sondyqtan para suraǵany úshin de, talap úshin de qylmystyq jaýapkershilik belgileý usynylady. Áıtpese, kináli adam para suraǵanyn, biraq talap etpegenin nemese kerisinshe, dáleldep jazadan qutyla alady dep oılaımyz», - dep ózgeriske túsindirme bergen Sybaılas jemqorlyqqa qarsy is-qımyl agenttigi.
Qujat 17 shildege deıin kópshilik talqylaýda bolady.