Parany alǵan nemese bergennen bólek, oǵan jaıly jaǵdaı jasaǵan adam da jazalanady – mınıstr

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev sybaılas jemqorlyqqa qarsy is-qımyl zańnamasyna engizilgen ózgerister jaıly pikir bildirdi, dep habarlaıdy QazAqparat tilshisi.

«Jemqorlyqqa qarsy kúres – kún tártibindegi óte mańyzdy másele. Qazirgi tańda qoǵamda osynaý áleýmettik keselge qarsy kúreste nátıjelilikke jetý boıynsha naqty talaptar qalyptasqan. Sol sebepti, Prezıdent qol qoıǵan ózgerister – barlyǵy úshin belgi. Jaýapkershilik árkimniń moınynda bolady. Parany alǵan nemese bergen adam ǵana emes, bul qylmysqa jaıly jaǵdaı jasaǵan adam da jazalanady. Bul sheshim – qazaqstandyqtardyń barlyǵynyń qoldaýyna ıe», - dedi Dáýren Abaev «Ashyq dıalog» baǵdarlamasynda.

Aıta ketsek, buǵan deıin Memleket basshysy «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵan bolatyn.