Paralımpıada júldegerleri beınelengen poshta markalary shyqty

ASTANA. QazAqparat - Qazposhta Rıo-de-Janeıroda ótken Paralımpıada júldegerlerine arnap poshta markalaryn shyǵardy, dep xabarlaıdy QazAqparat.

"Qazposhta" AQ "Sport" toptamasyndaǵy markalarda Rıo-de-Janeırodaǵy XV Paralımpıadalyq oıyndardyń júzýden chempıony jáne álemdik rekord ıegeri Zúlfııa Ǵabıdýllına, Rıo-de-Janeırodaǵy XV Paralımpıadalyq oıyndardyń paýerlıftıngten kúmis júldegeri Raýshan Qoıshybaeva beınelengen.

Poshtalyq aınalymǵa engizý saltanatty rásimine Zúlfııa Ǵabıdýllına men Raýshan Qoıshybaeva, QR Paralımpıada komıtetiniń atqarýshy dırektory Erlan Súleımenov qatysty.

 

"Osylaı bizge kóńil bólip, elep-eskerip jatqandaryńyzǵa kóp raxmet! Ótken Paralımpıadada júlde alyp kelgenimiz úshin, qaı jerde bolsaq ta, Olımpıada chempıondarymen teń qaraǵandaryńyz bizge úlken qýanysh syılaıdy, dárejemiz qatar kele jatyr. Buryn-sońdy bolmaǵan mundaı jaǵdaı. Endi bizdiń esimderimiz Qazaqstanǵa ǵana emes, búkil álemge taraıdy. Sol úshin Qazposhta ujymyna zor alǵys!", - deıdi R. Qoıshybaeva.

 

"Poshta markalarynda beınemizdiń shyqqany kóńilimizge qýanysh syılap otyr. Múmkin qazaqstandyqtar markalardaǵy Paralımpıada sportshylaryn kórip, sportpen shuǵyldanýǵa, maqsat qoıýǵa talpynys jasaıdy dep senemin", - dep atap ótti Z. Ǵabıdýllına.