Paralımpıada oıyndarynyń jeńimpazdary men júldegerleri elge oraldy
Olardyń qatarynda Paralımpıada oıyndarynyń chempıony Aqmaral Naýatbek (para dzıýdo) pen Davıd Degtıarev (para paýerlıftıng), kúmis júldeger atanǵan Erǵalı Shameı (para dzıýdo), Nurdaýlet Jumaǵalı (para júzý), qola júldege qol jetkizgen Daıana Fedosova (para dzıýdo), Zarına Raıfova (para dzıýdo) men Jurqamyrza Shýkýrbekov (para dzıýdo) jáne para dzıýdo, para paýerlıftıng, para júzý, voleıboldy otyryp oınaý, para kanoe qurama komanda ókilderi bar. Sportshylardy Astana áýejaıynan týystary, dostary, jankúıerleri men Qazaqstandaǵy sport uıymdarynyń ókilderi qarsy aldy.
Aldymen sóz kezegin Týrızm jáne sport mınıstri Erbol Myrzabosynov aldy. Ol Parıj tórinde el namysyn abyroımen qorǵaǵan paralımpıadashylarǵa alǵysyn bildirip, aldaǵy dodalarda da Qazaqstan mereıin asqaqtata beretinine senim bildirdi.
«Osy Paralımpıadanyń nátıjeleri qazaq parasporty tarıhyndaǵy eń úzdik boldy – Qazaqstan quramasy medaldar sany boıynsha rekordtyq kórsetkishke qol jetkizdi. Davıd Degtıarev – el tarıhynda tuńǵysh eki dúrkin Paralımpıada chempıony. Ózderińiz biletindeı, biz olımpıadalyq sport túrleri sııaqty parasport túrleri úshin de teń jaǵdaı jasaýǵa tyrysamyz. Chempıondarymyzdyń jattyǵý tehnıkasyn zerttep, basqa sportshylarǵa qoldanýdy josparlap otyrmyz. Balalar arasynda parasportty damytý boıynsha da belsendi jumys júrgiziletin bolady», - dedi Týrızm jáne sport mınıstri Erbol Myrzabosynov.
Aıta keteıik, qazaqstandyq sportshylar Paralımpıadadan medaldar sany boıynsha rekordtyq kórsetkishpen oraldy. Óz kezeginde Paralımpıada chempıony Aqmaral Naýatbek álemdik dodada jankúıerlerdiń senimin aqtaǵanyn aıta kele, olardyń qoldaýy erekshe bolǵanyn atap ótti.
«Bul nátıjege jetý úshin biz kóp jumys istedik. Elimizdiń jáne bizge sengen árbir adamnyń qoldaýy barlyq qazaqstandyq paralımpıadashyǵa sońyna deıin kúresýge kúsh berdi. Biz Qazaqstandy álemdik arenada tanytqanymyzdy maqtan tutamyz jáne shekteý tek mıda ǵana bolatynyn dáleldedik», - dedi 2024 jylǵy Paralımpıada oıyndarynda altyn alǵan dzıýdoshy Aqmaral Naýatbek.
Paralımpıada jeńimpazynyń sózine dúıim jurt shapalaq soǵyp, qoshemet kórsetti.
Jalpy, 2024 jyly Parıjde ótken Paralımpıada oıyndarynda Qazaqstan namysyn sporttyń 9 túrinen 44 sportshy qorǵady, bul rekordtyq kórsetkish boldy. Bizdiń qurama medaldyq esepte 39-orynǵa ıe boldy.
Aıta keteıik, XVII jazǵy Paralımpıada oıyndarynda para paýerlıftıngten 54 kg salmaq dárejesinde synǵa túsken Davıd Degtıarev altyn medal jeńip aldy. Jerlesimiz 188 kg salmaqty eńserip, eki dúrkin Paralımpıada chempıony atandy. Para dzıýdodan 48 kg salmaq dárejesinde (J2 sanaty) beldesken Aqmaral Naýatbek Parıj Paralımpıadasynyń jeńimpazy atandy. Al, Nurdáýlet Jumaǵalı Parıj Paralımpıadasynyń fınalynda SB13 sanatynda 100 metrge brass ádisimen júzýde kúmis medal jeńip aldy.
Para dzıýdodan J1 sanatynda 73 kg salmaqta óner kórsetken Erǵalı Shámeı fınaldyq beldesýde rýmynııalyq balýan Florın-Aleksandr Bologaǵa jol berip, Parıj Paralımpıadasynyń kúmis júldegeri atandy. J2 sanaty boı̆ynsha 57 kelidegi Daıana Fedosova qola júlde úshin beldesýde Túrkııa ókili Dëndıý Eshılıýrtty jeńip, el qorjynyna kezekti júldeni saldy.
Para dzıýdodan áıelder arasynda +70 kg salmaq dárejesinde J2 sanatynda beldesken Zarına Raıfova qola medal jeńip aldy. Úshinshi oryn úshin ótken kezdesýde Raıfova ıtalııalyq Karolına Kostadan basym tústi. Al, Jurqamyrza Shúkirbekov para dzıýdodan J2 sanatynda 90 keli salmaqty synǵa túsip, qola medal jeńip aldy.