Paralımpıada: Qazaqstandyq júzýshi fınalǵa óte almady

TOKIO. QazAqparat – Tokıo qalasyndaǵy Paralımpıada oıyndarynda áıelder arasynda 100 metrge erkin júzýden irikteý ótti, dep habarlaıdy QazAqparat Sports.kz saıtyna silteme jasap.

Jarysqa qazaqstandyq sportshy Álııa Rahymbekova qatysty. Start qorytyndylary boıynsha Álııa qashyqtyqty 1:12.45 mınýt ýaqytta ótip, óz tobynda besinshi oryn alǵan. Jalpy hattamada Álııa fınalǵa ótken «segizdikke» kire almaı, onynshy orynnan kórindi. Eske sala ketsek, buǵan deıin Rahymbekova shalqalap júzý boıynsha júz metrlik jarysqa qatysyp, segizinshi oryndy qanaǵat tutqan edi.

Tokıodaǵy Paralımpıada oıyndary 5 qyrkúıekke deıin jalǵasady, onda Qazaqstannyń namysyn 25 sportshy qorǵap júr.