Paralımpıada chempıony Oksana Lım 51 jasynda dıplom aldy

PAVLODAR. QazAqparat – Para-atletıka jáne trıatlon boıynsha halyqaralyq dárejedegi sport sheberi, múgedekter arbasynda júgirýden Shanhaı yntymaqtastyq uıymy (ShYU) marafonynyń jeńimpazy Oksana Lım dıplom aldy, dep habarlaıdy QazAqparat.

Álkeı Marǵulan atyndaǵy Pavlodar pedagogıkalyq ýnıversıtetiniń baspasóz qyzmeti taratqan aqparatqa sáıkes, túlekterge dıplom tapsyrý rásimi ótken. Bilim oshaǵynyń 800-ge jýyq túlegi ustazdyq biliktiligin rastaıtyn dıplomǵa ıe boldy. Olardyń arasynda Oksana Lım bar.

«Men psıhologııa boıynsha bakalavr dárejesin alyp, múmkindigi shekteýli sportshylarmen sport psıhologi bolyp jumys isteýdi josparlap otyrmyn», - deıdi ol.

Oksana Lımniń kýratory – Óner jáne sport joǵary mektebiniń ekspert- oqytýshysy Olga Chernyshova. Sondaı-aq, Pavlodar qalasyndaǵy múmkindigi shekteýli jandarǵa arnalǵan sport klýbynyń jattyqtyrýshysy, halyqaralyq dárejedegi sport sheberi Vıacheslav Dýbının Andreevıch jattyqtyrady.

Ol sporttyq mansabyn 2005 jyly jeńil atletıkadan bastaǵan. Qorjynynda oblystyq, respýblıkalyq, halyqaralyq jarystardyń kóptegen altyn medaldary bar. Sporttyń birneshe túrinen halyqaralyq dárejedegi sheber.

2017 jylǵa deıin múgedekter arbasyndaǵy halyqaralyq jarystarda baq synady. 2018 jyldan bastap trıatlonǵa aýysty: ıadro, dısk jáne naıza laqtyrý. Bıyl Almatyda ótken Paralımpıada oıyndarynda da sátti óner kórsetip, birden úsh «altyndy» jeńip aldy.

Sonymen qatar, sportshy 2009-2018 jyldar aralyǵynda múgedekter arbasyndaǵy bımen aınalysqan. Bul mansabyn tastamaǵan, biraz ýaqytqa keıinge qaldyryp otyr.