Paralımpıada «altyny» úshin Aleksandr Kolıadın 250 myń dollar alady
Shtattaǵy ulttyq komandalar jáne sporttyq rezerv dırektsııasy dırektorynyń orynbasary Alekseı Krıýchkov Phenchhandaǵy 2018 jylǵy Paralımpıada oıyndarynda medal alǵan qazaqstandyqtarǵa qansha syıaqy beriletinin aıtqan bolatyn.
«Bul másele sheshilgen. Olımpıadalyq komanda sekildi paralımpıadashylar da altyn medal úshin 250 myń dollar alady. «Kúmis» 150 myń dollarǵa baǵalandy, al úshinshi orynmen kelgen sportshyǵa 75 myń dollar beriledi. Budan tys, 4, 5 jáne 6-oryndar úshin de tıisinshe 30, 10 jáne 5 myń dollar mólsherinde syıaqylar berý kózdelgen. Bul máselede Qazaqstan álemde birinshi orynda tur. Árıne, bul da sportshyny yntalandyrýǵa qyzmet etedi, degenmen, negizgisi ol emes dep úmittenemin. Otanǵa degen súıispenshilik bárinen de qymbat», - deıdi Krıýchkov.
Aıta keterligi, sportshylardan bólek, bapkerlerge de aqshalaı syılyqtar beriledi.
Eske sala keteıik, Aleksandr Kolıadın klassıkalyq ádispen 1,5 shaqyrymdyq sprınterlik shańǵy jarysyn fınalynda 4 mınýt 19,7 sekýnd nátıje kórsetip, altyn medaldy jeńip alǵan bolatyn.
Aleksandr Kolıadın 1973 jylǵy 20 aqpanda Qostanaı oblysynda týǵan. 1997 jyly 3-top múgedegi bolyp qalǵan soń, oń aıaǵyna protez salyndy. Taǵdyrdyń taýqymetine moıymaǵan jigerli azamat 2013 jyly Nıkolaı Stepınniń jetekshiligimen shańǵy jarysymen barynsha shuǵyldana bastaıdy. 2014 jyldan beri Vasılıı Kolomıetstiń qolastynda jattyǵyp keledi. Avtokran basqarýshysy mamandyǵyna ıe, shańǵy jarysy boıynsha Qazaqstan Respýblıkasynyń sport sheberi.
Buǵan deıin 1994 jyly Norvegııanyń Lıllehammer qalasynda ótken qysqy Paralımpıadada Qazaqstan quramasy sapynda shańǵyshy Lıýbov Vorobeva kúmis medal alǵan edi.