Paralımpıada-2024: Onynshy jarys kúniniń nátıjesi qandaı boldy

<p>ASTANA. KAZINFORM &ndash; QR Týrızm jáne sport mınıstrliginiń baspasóz qyzmeti Parıjde ótip jatqan paralımpıada oıyndarynyń onynshy kúniniń nátıjelerin jarııalady.</p>

Para dzıýdo: Jurqamyrza Shúkirbekov J2 sanatynda 90 keli salmaqta synǵa túsip, qola medal jeńip aldy. Úshinshi oryn úshin ótken beldesýde ol Frantsııa ókili Naser Zorganıdi ıpponmen tize búktirdi.

Áıelder arasynda +70 kg salmaq dárejesinde J2 sanatynda beldesken Zarına Raıfova qola júldege qol jetkizdi. Úshinshi oryn úshin ótken kezdesýde Raıfova ıtalııalyq Karolına Kostadan basym tústi.

J2 sanatynda 90 kg salmaqtaǵy Ǵalymjan Smaǵululy men Baýyrjan Arystanbekov alǵashqy beldesýlerinde, J1 sanatynda +90 kg salmaqta óner kórsetken Erlan Ótepov jubanysh kezdesýinde jeńilip qaldy.

Para paýerlıftıng: 73 kg salmaq dárejesindegi saıysta Raýshan Qoıshybaeva 117 kg nátıjemen 4-orynǵa turaqtady.

88 kg salmaqta baq synaǵan Rahmetjan Hamaev 200 kg kóterip, Paralımpıadany 6-orynmen aıaqtady.

Para kanoe: VL3 sanatynda 200 metrge jarystyń jartylaı fınalynda Jańyl Baltabaeva 1:02.13 sekýnd ýaqytpen fınalǵa shyǵa almady.

KL2 sanatynda 200 metrge jarystyń jartylaı fınalynda Bıbarys Spataı 45.47 sekýnd nátıjemen fınaldan tys qaldy.