Paralımpıada-2024: Qazaqstan quramasynyń basty úmitkerleri kimder
Jazǵy Paralımpıada oıyndaryndaǵy jetistikter
1996 jyldan beri qazaqstandyq sportshylar jazǵy Paralımpıada oıyndarynda sýda júzý, parapaýerlıftıng jáne paradzıýdo sııaqty sport túrlerinen 7 medal (2 altyn, 4 kúmis jáne 1 qola) jeńip aldy.
2016 jyly Rıoda júzýden Zúlfııa Ǵabıdýllına altyn medal enshilese, Raýshan Qoıshybaeva parapaýerlıftıngten kúmispen kúpteldi.
2020 jyly Tokıoda Qazaqstan quramasy 1 altyn, 3 kúmis jáne 1 qolany qorjynǵa saldy. Tokıo altynyn parapaýerlıftıngten Davıd Degtıarev ıelense, úsh kúmisti paradzıýdoshylar Dáýlet Temirjan, Zarına Baıbatına jáne Ánýar Sarıev moınyna taqty. Al júzýden Nurdáýlet Jumaǵalı qolaǵa qol jetkizdi. jeńip aldy. Osylaısha, Tokıodaǵy Paralımpıada oıyndarynyń medal tiziminde Qazaqstan 5 júldemen 51-orynǵa turaqtady.
Parıj hám otandyq paralımpıadashylar
2024 jyly Parıjde ótetin Paralımpıada oıyndarynda el quramasy sapynda para júzý, para paýerlıftıng, para jeńil atletıka, kanoede esý, para taekvondo, otyryp voleıbol oınaý, para atý, ústel tennısi, para dzıýdo sııaqty 9 sport túrinen 44 sportshy júldege talasady.
Aıta keteıik, dodaǵa Paralımpıada oıyndarynyń chempıondary Zýlfııa Ǵabıdýllına men Davıd Degtıarev, Paralımpıada oıyndarynyń júldegerleri Raýshan Qoıshybaeva (kúmis) pen
Nurdáýlet Jumaǵalı (qola) qatysyp, taǵy bir márte myqtylyǵyn pash etpek.
Eń kóp lıtsenzııany paradzıýdoshylar (10 adam) jeńip alǵanyn atap ótken jón.
Qazaqstan quramasynyń úmiti
Tanymal sport jýrnalısi Dmıtrıı Nesterenko Qazaqstan bıyl rekordtyq lıtsenzııa jeńip alǵanyn atap ótti. Sáıkesinshe, qorjynǵa túsetin medal sany kóp bolady degen úmitte.
«1998 jyldan beri alǵash ret lıtsenzııa alǵan bizdiń paravoleıbol komandasynyń ónerin tamashalaý qyzyqty bolǵaly tur», - dedi Nesterenko.
Onyń aıtýynsha, Zúlfııa Ǵabıdýllına men Nyshan Ómiráliniń, sondaı-aq paradzıýdo quramasynyń ókilderiniń júldege múmkindikteri zor.
«Eger medalǵa degen úmit týraly aıtatyn bolsaq, árıne, sýda ózin balyqtaı sezinetin Zýlfııa Ǵabıdýllınany atap ótýge bolady. Jas kórsetkishine qaramastan, ol ekinshi paralımpıada altynyn alýdy maqsat etip otyr. Árıne, paradzıýdo men parataekvandodan da medal kútemiz. Eki dúrkin álem chempıony Nyshan Ómiráli de Parıjde altyn alýǵa tyrysatyny anyq», - dedi ol.
Sonymen qatar, Nesterenko Sevda Alıevanyń para atýdan medal alýǵa úmiti bar ekenin boljap otyr. Ol para-bıden aýysyp, jańa sport túrin jedel meńgerip alǵanyn atap ótken jón.
«Men Sevda Alıevanyń para atýdan medal alatynyna sengim keledi. Ol para bıden jaqynda ǵana aýysty, biraq chempıondyq rýh az ýaqyttyń ishinde Paralımpıada joldamasyn ıelenýge múmkindik berdi», - dedi ol.
Sport jýrnalısi Davıd Degtıarevtiń de jetistigine úmittenetinin aıtyp, Álı Maqulbekov óner kórsetetin para atletıka men para ústel tennısinen lıtsenzııalardyń bar ekenin eske saldy. ıAǵnı, kútpegen jerden el qorjynyna júlde túsýi de ǵajap emes.
Delegatsııalar men qatysýshylardyń rekordtyq sany
«2024 jyly Parıjde ótetin Paralımpıada oıyndaryna delegatsııalar men áıelderdiń rekordtyq sany qatysady», dep habarlady Halyqaralyq Paralımpıada komıteti.
Komandalardyń úzdiksiz kelýine baılanysty sońǵy sandar áli anyqtalyp jatyr, jalpy, 168 delegatsııa sapynda shamamen 4400 sportshy qatysady dep boljanýda.
Delegatsııalar sany London-2012 jáne Tokıo-2020 Paralımpıada oıyndarynda tirkelgen (164) rekordyq kórsetkishten asatynyn jazdyq. Al qatysýshylar sany boıynsha aldyńǵy rekord Tokıo oıyndaryna (4393 sportshy) tıesili edi.
Parıj Paralımpıada oıyndarynda 1983 áıel sporttyń 22 túrinen 549 medal úshin saıysqa túsedi.
Buǵan deıin jazǵanymyzdaı, Qazaqstan atynan 44 sportshy júldege talasady. Bul da rekordtyq kórsetkish ekenin eske salamyz.
2024 jylǵy Paralımpıada oıyndaryndaǵy bes iri delegatsııa
2004 jyly Afınydan beri árbir Paralımpıada oıyndarynda medaldar sany boıynsha kósh bastap kele jatqan Qytaı bıyl 282 sportshysyna senim artyp otyr.
Brazılııa 255 sportshysymen ekinshi orynda tur. Jarysty qabyldaýshy el Frantsııa 237 sportshymen qatysady.
AQSh quramynda 220, Ulybrıtanııa sapynda 201 sportshy bar.
Buǵan deıin Premer-Mınıstr Oljas Bektenov eki tý ustaýshyǵa – Azııa Paralımpıada oıyndarynyń jeńimpazy, Qazaqstan chempıonatynyń on dúrkin jeńimpazy Berik Іzmaǵanbetovke (paravoleıbol) jáne oq atýdan Qazaqstan chempıonatynyń jeńimpazy Sevda Álıevaǵa memlekettik týdy tabys etken bolatyn.
Sondaı-aq, XVII Jazǵy Paralımpıada oıyndaryna qatysatyn qazaqstandyq paralımpıadashylardyń alǵashqy legi Parıjge attandy.
Búgin, 28 tamyzda Paralımpıada oıyndarynyń ashylý saltanaty ótedi.
Jarys kestesi:
- 29, 30, 31 tamyz: parataekvondo;
- 29, 31 tamyz, 2, 5, 6 qyrkúıek: paravoleıbol;
- 30, 31 tamyz, 4, 5 qyrkúıek: jeńil atletıka;
- 31 tamyz, 1, 4 qyrkúıek: oq atý;
- 1, 3, 4, 5, 6 qyrkúıek: juptyq júzý;
- 1, 2, 4, 6, 7 qyrkúıek: ústel tennısi;
- 5, 7 qyrkúıek: paýerlıftıng;
- 5, 6, 7 qyrkúıek: paradzıýdo;
- 6, 7 qyrkúıek: parakanoe.