Para Azııa oıyndary: Qorjynymyzǵa taǵy 8 júlde tústi

ASTANA. QazAqparat - 10 qazan kúngi qorytyndy boıynsha Qazaqstan sportshylarynyń júlde sany taǵy 8 medalmen tolyqty, dep habarlaıdy QazAqparat tilshisi.

Para Azııa oıyndarynyń 10 qazan kúngi nátıjesi boıynsha qanjyǵamyzda 1 altyn, 4 kúmis jáne 3 qola júlde bar.

Elimizge júlde syılaǵan jeńimpazdarǵa toqtalsaq, alǵashqy bolyp altyndy 50 metrge erkin júzýden Erjan Sálimgereev syılady. Osy sport túrinen 200 metr kórsetkish boıynsha Zúlfııa Ǵabıdýllına qola medal ıemdendi.

Sol sııaqty qatarynan qos kúmisti parasportshymyz Sergeı Kınah syılady, birinshi júldeni 100 metrge brass stılinde júzýden ıelense, ekinshisin 50 metrge erkin júzýden aldy. Jáne bir kúmis júldeni 100 metrge brass stılinde júzýden Ánýar Ahmetov qanjyǵasyna baılady, sondaı-aq sportshy jeke rekord ornatty.

Tórtinshi kúmis medaldi jeńil atletıka boıynsha ıadro laqtyrýdan 14,66 metr kórsetkish nátıjesimen Ravıl Mansurbaev oljalady. Atalǵan sport túrinen 11,69 metr kóresetkishpen Ivan Zaleznıak qola júldeni ıemdendi.

Osylaısha ázirge barlyq sany 23 medalmen (4 altyn, 10 kúmis, 9 qola) jalpy komandalyq esepte 13 orynda turmyz.

Erteń elimizdiń para ústel tennısi komandasy Makao jáne Qytaı komandalarymen synǵa túsedi. Aıta ketý kerek, eger Makao komandasyn jeńgen jaǵdaıda tennısshilerimiz kezekti júldege úmitker bolady.

Eske salsaq, Indonezııanyń Jakarta qalasynda ótip jatqan ІІІ Para Azııa oıyndaryn Qazsport telearnasy tikeleı kórsetedi.