Panfılovshylar parki qaıta qalpyna keltirý: 400 mln teńge únemdeldi

ALMATY. QazAqparat – Almaty jaıly qalalyq orta basqarmasynda 28 Panfılovshylar parkin qaıta qalpyna keltirý jumystary qalaı júrip jatqanyn aıtyp berdi, dep habarlaıdy QazAqparat tilshisi.

Áleýmettik jelide qalyń kópshilik atqarylyp atqan jumystarǵa qatysty kóp syn aıtqan bolatyn.

«Aıtylǵan eskertýlerdi eskere otyryp, bul parkterdegi jumystar qala ákimi Baqytjan Saǵyntaevtyń baqylaýynda tur. Qala basshysy kún saıyn jumystyń esebin talap etip jatyr. Ákimdik ókili qurylys alańynda jumystardy jiti qadaǵalaýda. Osyǵan deıin bolǵan zań buzýshylyqtar úshin merdiger uıym jazasyn aldy», - dedi qoǵamdyq keńes otyrysynda basqarma basshysy Sapar Nurashev.

Onyń aıtýynsha, merdiger kompanııa jarty mıllıon aqsha tólegen. Al joba quny 1 mlrd teńgege deıin ońtaılandyryldy.

«Búginde memlekettiń 400 mln teńgesin únemdedik. Qoǵam belsendileri, jaqyn arada turatyn turǵyndar park ishinde sýburqaq salýdyń, jańa balalar alańynyń qurylysynyń qajet emestigin aıtty. Qonaev kóshesinen máńgilik alaýǵa deıingi kespetas ta 2018 jyly jasalǵan jóndeý jumystarymen tóselip ketti. Tek buzylǵan asfalt betteri ǵana jamalyp, sýarý júıesi jańartylady.

Kólemi 17 ga bolatyn parkte 300 tekshe metr kólemdi rezervýar ornatylǵan. Sebebi, sonsha aýmaqty sýarý kerek. Odan bólek 210 oryndyq, ýrna ornatylady», - dedi Sapar Nurashev.