Panfılovshylar el esinde

ASTANA. QazAqparat - Máskeý qalasynyń Taǵzym taýynda ornalasqan Uly Otan soǵysyna arnalǵan Ortalyq memlekettik mýzeıde Panfılov dıvızııasynyń qurylǵanyna 75 jyl tolýyna baılanysty saltanatty jıyn ótti.

Sharaǵa qatysýshylar birinshi kezekte maıdan dalasynda er­likpen qaza tapqan, soǵystan keıingi beıbit ómirdiń dámin tata júrip ómirden ozǵan panfılovshylardy bir mınýttyq únsizdikpen eske aldy. Budan keıin Máskeý qalalyq ulttyq saıasat, aımaqaralyq baılanys jáne týrızm departamenti basshysynyń orynbasary Ivan Petrov jıyndy resmı túrde ashty. Sondaı-aq, ol Máskeý meri Sergeı Sobıanınniń jıynǵa qatysýshylarǵa joldaǵan quttyq­taý hatyn oqyp berdi, dep jazady "Egemen Qazaqstan" gazeti.

«Uly Otan soǵysynyń biz úshin jeńispen aıaqtalýyna ha­lyq­tar dostyǵy, ózara baýyr­lastyǵymyz tikeleı áser etip, mańyzdy ról atqardy. Keńes Odaǵynyń quramyndaǵy barlyq respýblıkalardan jınalǵan sarbazdar jerimizdi jaýdan azat etti. Qıyn-qystaý kezde túrli ult ókilderinen quralǵan, Más­keýdi dushpannan jan aıamaı qorǵaǵan panfılovshylar dıvızııasy halyqtar dostyǵynyń, yntymaǵynyń jarqyn úlgisin kórsete bildi. Panfılovshylar jaýdyń Volokolamsk baǵytyna jumyldyrylǵan qýatty kúshin jankeshtilikpen toqtatyp, dush­pandy zor shyǵynǵa ushyratty.

Biz elimizdi jaýdan qorǵaýda kórsetken panfılovshylardyń erligine árqashan basymyzdy ıemiz. Uly Otan soǵysynyń batyrlary, olardyń erlikteri halyq jadynan óshpeıdi», - delingen Máskeý meriniń quttyqtaý hatynda.

Elimizdiń Reseıdegi áskerı attashesiniń kómekshisi Azamat Jańbyrbaev óz kezeginde Pan­fılov dıvızııasynyń qazaq­standyqtar úshin úlken mańyzǵa ıe ekenin jetkizdi. «Keńes Oda­ǵynyń Batyry Ivan Vasıl­evıch Panfılovtyń esimin qa­za­q­standyqtar árdaıym qur­met­pen eske alady. Bizdiń ortaq tarıhymyzda 28 gvardııashy panfılovshylardyń erligi úlken mańyzǵa ıe. Máskeý úshin bolǵan shaıqas Uly Otan soǵysynyń eń bir aýyr tustary boldy. Eýropanyń jartysyn jaýlap alǵan Gıtlerdiń ańyzǵa aınalǵan qýatty armııasy dál osy Máskeý túbindegi shaıqasta alǵash ret zor shyǵynǵa ushyrap, beti qaıtty. Osy urysta qazaqstandyq jaýyngerler erliktiń qaıtalanbas úlgisin kórsetti», - dedi A.Jań­byrbaev.

Saltanatty jıynda Máskeý qalasynyń Taǵzym taýynda or­nalasqan Uly Otan soǵysyna arnalǵan Ortalyq memlekettik mýzeı dırektorynyń orynbasary Aleksandr Sýrnov, Máskeý mádenıet ınstıtýtynyń professory, saıasattaný ǵylymdarynyń doktory Raýshan Qanapııanova, Máskeý qalalyq ardagerler keńesi tóraǵasynyń orynbasary Ivan Harkov, I.V.Panfılovtyń nemereleri - Alýa jáne Aıgúl Baıqadamovalar jáne reseılik «Jaýjúrek polk» qoǵamdyq-patrıottyq qozǵalysy jetek­shileriniń biri Nıkolaı Zemtsov sóz sóıledi. Olardyń barlyǵy panfılovshylardyń Otan al­dyn­daǵy boryshyn oryndaýda kórsetken erligin jan-jaqty áńgimelep berdi. Sharaǵa Uly Otan soǵysynyń ardagerleri, Qazaq­stan, Qyrǵyzstan, Belarýs elderiniń azamattary, Reseı Memlekettik dýmasynyń depýtattary jáne reseılik qoǵamdyq uıymdardyń ókilderi qatysty.

TMD elderiniń ózara mádenı baılanystaryn nyǵaıta túsý, óskeleń urpaqty otansúıgishtikke baýlý, kózi tiri ardagerlerimizge qurmet kórsete otyryp, olardyń ómirden ozǵan qarýlastaryn eske alý baǵytynda uıymdastyrylǵan jıyndy Qazaqstannyń Reseıdegi elshiligi, Máskeý qalalyq ulttyq saıasat, aımaqaralyq baılanys jáne týrızm departamenti, más­keýlik ardager-panfılovshylar, Máskeý qalasynyń Taǵ­zym taýynda ornalasqan Uly Otan so­ǵysyna arnalǵan Orta­lyq mem­lekettik mýzeı bas­shylyǵy jáne «Shyǵys Prýs­sııada qaza tapqan keńes sarbaz­daryn eske alýǵa arnalǵan «Pa­mıat» («Es­kert­kish») qory» kommer­tsııa­lyq emes uıymy (Reseı) birlese ót­kizdi.