Panfılov dıvızııasynyń jaýyngeri búgin 101 jasqa toldy

NUR-SULTAN. QazAqparat – Búgin áıgili Panfılov dıvızııasynyń sońǵy jaýyngerleriniń biri, ekinshi dúnıejúzilik soǵys ardageri Qaıyrly Jonqabaev 101 jasqa toldy, dep habarlaıdy QazAqparat Ulttyq gvardııanyń baspasóz qyzmetine silteme jasap.

QR Ulttyq ulany «Ońtústik» óńirlik qolbasshylyǵy qolbasshysynyń orynbasary, polkovnık Nııaztaı Álkeshevtiń basshylyǵymen Ulttyq ulannyń áskerı qyzmetshileri jáne Ardagerler keńesiniń tóraǵasy, zapastaǵy polkovnık Asatýlla Qulahmetov qarııanyń shańyraǵyna arnaı baryp, eseli eńbegi men ǵıbratty ǵumyryn aıryqsha atap, quttyqtady.

5571 áskerı bóliminiń orkestri soǵys jyldaryndaǵy ánderdi oryndady. Al ulandyq jaýyngerler saltanatty sherýmen júrip ótti.

«Búgin biz, Ulttyq ulannyń áskerı qyzmetshileri soǵys ardageri, aty ańyzǵa aınalǵan Panfılov dıvızııasynyń soldaty Qaıyrly Ýataıuly Jonqabaevty quttyqtaýǵa keldik. Jyl saıyn ardagerlerge qurmet kórsetý bizdiń dástúrimizge aınaldy. Biz olardyń Otanǵa janqııarlyq qyzmetiniń, soǵys jyldaryndaǵy kózsiz erlikteriniń úlgisinde óskeleń urpaqty tárbıeleımiz. Ókinishke oraı, jyl ótken saıyn ardagerlerimiz azaıyp keledi», - dedi «Ońtústik» óńirlik qolbasshylyǵy qolbasshysynyń orynbasary polkovnık Nıaztaı Álkeshev.

Qaıyrly Ýataıuly 1921 jyly 10 qyrkúıekte Shyǵys Qazaqstan oblysy Samar aýdanynda dúnıege kelgen. Eńbek jolyn 1940 jyly ShQO Qulja orta mektebinde muǵalim bolyp bastaǵan. 1941 jyly qazan aıynda Panfılov dıvızııasynyń 23-shi gvardııalyq polkine Qyzyl Ásker jaýyngeri bolyp alyndy. Soǵysqa basynan aıaǵyna deıin qatysqan. 8-gvardııalyq atqyshtar dıvızııasy quramynda pýlemetshi bolǵan. Keńes Odaǵynyń Batyry Málik Ǵabdýllınmen bir rotada boryshyn ótegen. Belorýssııa, Polsha, Estonııany azat etýge qatysqan. 1943 jyly aqpanda Rjevtegi qandy maıdanda aýyr jaralanǵan, jeńisti Drezdende qarsy aldy.

Soǵystan keıin Samar aýdandyq atqarý komıtetinde bólim meńgerýshisi bolyp istedi. Aýdandyq tutynýshylar odaǵynyń júıesinde basshylyq laýazymdarynda bolǵan. 1970-1983 j.j. Almatydaǵy qoǵamdyq tamaqtandyrý júıesinde sharýashylyq esepteriniń dırektory boldy. 1983 jyly qurmet demalysyna shyqty, bes bala tárbıelep ósirdi.

ІІ dúnıejúzilik soǵysta kórsetken erlikteri úshin «Qyzyl Juldyz», jáne ІІ dárejeli «Otan soǵysy» ordenimen, «Erligi úshin», «Máskeýdi qorǵaǵany úshin» medaldarymen jáne basqa da kóptegen medaldarmen marapattalǵan.