Panfılov dıvızııasynyń sońǵy jaýyngeri ómirden ótti
Qaıyrly Ýataıuly Jonqabaev 1921 jyly 10 qyrkúıekte Shyǵys Qazaqstan oblysy Samar aýdanynda dúnıege kelgen. Eńbek jolyn 1940 jyly ShQO Qulja orta mektebinde muǵalim bolyp bastaǵan. 1941 jyly qazan aıynda Panfılov dıvızııasynyń 23-shi gvardııalyq polkine Qyzyl Ásker jaýyngeri bolyp alyndy.
Ardager soǵysqa basynan aıaǵyna deıin qatysqan. 8-gvardııalyq atqyshtar dıvızııasy quramynda pýlemetshi bolǵan, Keńes Odaǵynyń Batyry Málik Ǵabdýllınmen bir rotada bolǵan, Belorýssııa, Polsha, Estonııany azat etýge qatysqan. 1943 jyly aqpanda Rjevtegi qandy maıdanda aýyr jaralanǵan, jeńisti Drezdende qarsy aldy.
Soǵystan keıin Samar aýdandyq atqarý komıtetinde bólim meńgerýshisi bolyp istedi. Ári qaraı aýdandyq tutynýshylar odaǵynyń júıesinde basshylyq laýazymdarynda bolǵan. 1970 - 1983 j.j. Almatydaǵy obşepıt júıesinde sharýashylyq esepteriniń dırektory boldy. 1983 jyly qurmet demalysyna shyqty, bes bala tárbıelep ósirdi.
Uly Otan soǵysynda kórsetken erlikteri úshin «Qyzyl Juldyz», jáne ІІ dárejeli «Otan soǵysynyń» ordenimen, «Erligi úshin», «Máskeýdi qorǵaǵany úshin» medaldarymen jáne basqa da kóptegen medaldarmen marapattalǵan.
«Qart jaýynger búgin jer qoınyna berildi. Almaty mańyndaǵy Boraldaı zıratynda jatqan báıbishesiniń qasynan máńgilik oryn aldy. Atany sońǵy saparǵa shyǵaryp salýshylar arasynda Ulttyq ulan qolbasshylyǵy men ardagerleri boldy. Qaraly mıtıngide Qaıyrly Ýataıulynyń týystary ataǵa árdaıym kórsetip kelgen syı-qurmetteri jáne jerleý rásimin uıymdastyrǵany úshin áskerılerge alǵys bildirdi», - dep habarlady Ulttyq ulannyń baspasóz qyzmeti.
Eske salsaq, ardager aqsaqaldan 100 jasqa tolǵan jyly suhbat alǵan edik. Ol óziniń ómiri, qan maıdanda bastan keshken oqıǵalaryn, Jeńis kúnin qaıda qarsy alǵany, soǵystan keıingi ǵıbratty ǵumyry jaıynda aıtyp, aq batasyn bergen edi.
Ekinshi dúnıejúzilik soǵys ardageri Qaıyrly Jonqabaevtyń otbasy men týǵan-týystaryna kóńil aıta otyryp, atamyzdyń jatqan jeri jaryq, jany jumaqta bolsyn dep tileımiz.