Pandemııanyń Qazaqstandaǵy aýqymy týraly shynaıy málimet alatyn boldyq – Rahym Oshaqbaev

NUR-SULTAN. QazAqparat – «Talap» qoldanbaly zertteýler ortalyǵynyń dırektory Rahym Oshaqbaev Densaýlyq saqtaý mınıstri Alekseı Tsoıdyń koronavırýs pen pnevmonııa statıstıkasyn biriktirý bastamasyna qatysty pikir bildirdi. Onyń aıtýynsha, osy arqyly pandemııanyń Qazaqstandaǵy aýqymy týraly shynaıy málimet halyqqa jetedi, dep habarlaıdy QazAqparat tilshisi.

«Kovıdti pnevmonııa men bakterıaldy pnevmonııa bar. Onyń shyqqan tegin anyqtap bere alatyn arnaıy test baryn bilemiz. Biraq bizdiń elde ol joq. Densaýlyq saqtaý mınıstri búgin jarııalaǵan shara - óte durys. Biz osylaısha Qazaqstandaǵy epıdemııa aýqymy týraly shynaıy málimet alatyn boldyq», - dedi Rahym Oshaqbaev.

Onyń aıtýynsha, eldegi ahýaldyń qandaı ekenine qaramastan jalǵan málimet bermeý kerek.

«Aınalyp kelip pnevmonııa jaǵdaıy kóp bolyp shyqty da, koronavırýs ınfektsııasyn juqtyrǵandar sany 66 myń ǵana bolyp qaldy. Shynaıy ahýal qanshalyqty úreıli bolsa da, málimetti durys berý kerek. Sebebi jalǵan málimet halyqqa qısapsyz qıyndyq ákeledi. Artynsha qoǵam pandemııa aýqymyna jiti baǵa bere almaıdy. Sol sebepti koronavırýs pen pnevmonııa boıynsha statıstıkany biriktirýge qatysty Alekseı Tsoıdyń málimdemesin qoldaımyn», - dedi Rahym Oshaqbaev.

Eske sala ketsek Qazaqstanda pnevmonııamen aýyrǵandar KVI juqtyrǵandardyń statıstıkasyna engiziletin boldy. Osylaısha COVID-19 boıynsha jańa statıstıka 1 tamyzdan bastap júrgiziledi.