Pandemııanyń bolýy yqtımal jańa tolqynyna daıyndyq: Úkimet basshysy úsh mindet júktedi
«Elde vırýsqa testileý múmkindigi artty. Vaktsına satyp alý jóninde kelissózder ótkizilip, ózimizde vaktsına jasap shyǵarý boıynsha jumys uıymdastyrylǵan. Úkimet tarapynan aýqymdy júıeli jumys júrgizilýde. Qabyldanǵan sharalardyń nátıjesinde biz elimiz úshin kúrdeli kezeńdi eńserdik. Vırýstyń taralý deńgeıiniń tómen bolýy qamtamasyz etildi. Bastysy, bizdegi densaýlyq saqtaý júıesi koronavırýs juqtyrǵandardy emdeý boıynsha zor tájirıbe jınaqtady», - dedi Asqar Mamın Úkimet otyrysynda.
Premer-mınıstrdiń aıtýynsha, barlyq qabyldanyp jatqan sharalar kúzde paıda bolýy múmkin pandemııanyń jańa tolqynyna jáne maýsymdyq aýrýlarǵa qarsy kúresýge jaǵdaı jasaıdy.
«Árıne sanıtarııalyq talaptardy qatań saqtaý kerek. Álemdegi epıdemııanyń turaqsyzdyǵyn eskersek, vırýstyń qaıtadan órshý múmkindigine daıyndyq jumystaryn jalǵastyrýymyz kerek. Keıbir shekteý sharalaryn jalǵastyrý qajet. Osyǵan baılanysty mynadaı tapsyrma beremin: birinshiden, óńirlerdiń ákimderi epıdemıologııalyq jaǵdaıdy erekshe baqylaýda ustasyn, barlyq sanıtarııalyq normalardy qatań saqtasyn. Vırýstyń taralýy men aýrý juqtyrý kórsetkishteriniń ózgerýine qaraı jedel ári naqty áreket etsin. Infraqurylymdy daıyndaý sharalaryn qabyldasyn jáne barlyq satydaǵy medıtsına jumyskerleriniń qaýipsizdigin qamtamasyz etsin», - dedi ol.
Úkimet basshysy ekinshiden, Densaýlyq saqtaý mınıstrligine múddeli memlekettik organdarmen birge halyq arasynda profılaktıkalyq jumysty kúsheıtýdi tapsyrdy.
«Emhanalardyń daıyndyǵyn baqylaýda ustaý qajet jáne de qaýip tobyndaǵy adamdardy naqty qadaǵalap turý kerek. Úshinshiden, tsıfrlyq damý mınıstrligi Densaýlyq saqtaý, Aqparat mınıstrlikterimen birge halyq arasynda aqparattyq-túsindirý jumysyn júrgizsin», - dep túıdi Premer-mınıstr.