Pandemııamen kúreste basqa jol joq – Altaı Kólginov turǵyndardy vaktsına alýǵa shaqyrdy

NUR-SULTAN. QazAqparat – Elordada medıtsınalyq qyzmetkerlerdiń 90 paıyzy jáne kommýnaldyq qyzmetterdiń 70 paıyzy vaktsına alǵan. Bul týraly Nur-Sultan qalasynyń ákimi Altaı Kólginov Ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.

«Qazir qala turǵyndary men ujymdardy vaktsınalaý jumystary belsendi júrip jatyr. Biz 100 vaktsınalaý beketin ashtyq, barlyq jeke jáne memlekettik ambýlatorııalyq emhanalar kún saıyn jumys isteıdi, sondaı-aq iri saýda ortalyqtarynda vaktsınalaý pýnktteri bar», - dedi A. Kólginov.

Sonymen birge, ákim adamdardy vaktsınalaýǵa yntalandyrý úshin qundy syılyqtar oınatylǵanyn eske saldy.

«Sarapshylardyń aıtýynsha, pandemııamen kúresýdiń basqa joly joq. Biz vaktsına alǵandardyń sanyn arttyryp, ujymdyq ımmýnıtetti qalyptastyrýymyz kerek. Qazir medıtsına qyzmetkerleriniń 90%-dan astamy, kommýnaldyq qyzmetkerleriniń 70%-dan astamy vaktsına saldyrǵan. Odan bólek, mobıldi toptar jumys isteıdi, ujymdarǵa baryp, vaktsına alýǵa kómektesedi. Bul – óte mańyzdy jumys. Barlyq qala turǵyndaryn tezirek vaktsına alýǵa jáne ózderi men jaqyndaryn qorǵaýǵa shaqyramyn», - dedi Altaı Kólginov.