Pandemııadan zardap shekken bıznes kredıtin 6 paıyzben qarjylandyrý kerek - Perýashev

NUR-SULTAN. QazAqparat - «Aq jol» demokratııalyq partııasy fraktsııasynyń depýtattary pandemııadan zardap shekken shaǵyn jáne orta bıznesti 6 paıyzben qaıta qarjylandyrýdy talap etti, dep habarlaıdy QazAqparat tilshisi.

«QR Prezıdenti osy jyldyń 1 qańtaryndaǵy Joldaýynda «ekonomıkanyń zardap shekken sektoryndaǵy shaǵyn jáne orta bıznestiń barlyq qoldanystaǵy kredıtteri boıynsha jyldyq 6 paıyzdyq mólsherlememen memlekettik sýbsıdııalaýdy qamtamasyz etý qajet« degen bolatyn. Sonymen qatar Prezıdent bul maqsatqa qsoymsha 200 mlrd teńge bólinetindigin, al sýbsıdııalaý baǵdarlamasynyń jalpy kólei 800 mlrd teńgege jetkiziletindigin habarlaǵan edi. Bul tapsyrma kásipkerlik qoǵamdastyq arasynda úlken rezonans týdyrdy», - dedi Premer-Mınıstr Asqar Mamınniń atyna depýtattyq saýal joldaǵan Azat Perýashev.

Májilis depýtatynyń dereginshe, tikeleı pandemııadan jáne onymen baılanysty sharalardan 1 mıllıonan astam kásipker zardap shekti. Bul elimizde tirkelgen bıznes sýbektileriniń úshten ekisin quraıdy.

Tótenshe jaǵdaıǵa jáne lokdaýn shekteýlerine baılanysty 430 myńnan astam kásipker jumysyn toqtatyp, onyń basym bóligi áli kúnge deıin qyzmetin jandandyrǵan joq. Ásirese kólik, saýda jáne qyzmet kórsetý, qoǵamdyq tamaqtaný, qonaq úı bıznes, jyljymaıtyn múlikpen baılanysty operatsııalar salalary úlken shyǵynǵa batty.

Alaıda Memleket basshysynyń tapsyrmasyna sáıkes elimizdiń barlyq óńirlerindegi shaǵyn jáne orta bıznes sýbektileriniń kredıtterin qaıta qarjylandyrý júrgizilmeı otyr.

«Osyǵan oraı biz Úkimetten, Ulttyq bankten jáne QR Qarjy naryǵyn retteý jáne damytý agenttiginen zardap shekken barlyq shaǵyn jáne orta bıznestiń kredıtterin 6 paıyzben qaıta qarshylandyrýdy shuǵyl, kidirtpesten bastaýdy ótinemiz. Sonymen qatar Prezıdent Joldaýynyń oryndalýyn sóz buıdaǵa salǵan laýazymdy tulǵalardy anyqtap, jaýapkershilikke tartýdy suraımyz», - dedi Azat Perýashev.