Pandemııadan keıin eńbek salasy burynǵydaı bolmaýy tıis – BUU

NUR-SULTAN. QazAqparat – Eńbek salasynda kúrdeli kemshilikterdi anyqtaǵan COVID-19 pandemııasy jappaı jumyssyzdyqqa ákep soqtyrýy múmkin. Al bul áleýmettik, ekonomıkalyq jáne saıası kúızeliske alyp keledi. Bul týraly BUU Bas hatshysy Antonıý Gýterrısh eskertti, dep habarlaıdy QazAqparat BUU jańalyqtary saıtyna silteme jasap.

«COVID-19 pandemııasy eńbek naryǵyn túgel ózgertti. Ózgeris árbir jumysker, árbir kásiporyn, jer sharynyń túkpir-túkpirine áser etken. Júzdegen mıllıon adam jumystan aıyryldy», - dep málimdedi BUU basshysy, uıymnyń «COVID-19 pen eńbek naryǵy» atty jańa zertteýin tanystyrý kezinde. Antonıý Gýterrısh daǵdarystyń birinshi aıynda ekonomıkanyń beıresmı sektorynda eńbek etip júrgenderdiń tabysy 60 paıyzǵa qysqarǵanyn atap ótti.

Kóptegen kompanııalar men olardyń qyzmetkerleri eńbek jaǵdaıynyń ózgerip jatqan jaǵdaıyna beıimdele bastaǵan. Mysaly, mıllıondaǵan adam onlaın rejımdegi jumysqa aýysty. Kóp jaǵdaıda qashyqtan eńbek etý jemisin bere bilgen. Alaıda barlyq jumys onlaın rejımde atqaryla almaıdy. Oǵan qosa, pandemııa kezeńinde birqatar qyzmet suranystan shyǵyp qalǵan.

Ekonomıster jabylýǵa týra kelgen shaǵyn jáne orta kásiporyndar endi qaıta ashylmaıtynyna alańdap otyr. Sebebi, olar pandemııa saldarynan jumysyn jalǵastyra almaıdy.

Osyǵan baılanysty Bas hatshy ózi usynǵan jańa zertteýge súıene otyryp, barlyq memleketterge qaýipti topqa kiretin kásiporyndar, olardyń jumysshylaryna tez arada qoldaý kórsetip, jumys oryndaryn saqtap qalýǵa, jabylmaýyna kómektesýdi usyndy.

«Daǵdarystan keıin eńbek salasy burynǵydaı bolyp qalmaýy tıis. Barlyq azamattar úshin laıyqty jumys oryndaryn quratyn úılestirilgen jahandyq, óńirlik jáne ulttyq deńgeıde kúsh salatyn ýaqyt keldi», - dep atap ótti BUU hatshysy.

Ol 2030 jylǵa deıingi kezeńge turaqty damý salasyndaǵy taqyrypty erekshe nazarǵa alyp, bul daǵdarystan myqty bolyp ótýge shaqyrdy.