Pandemııadan keıin damýdyń basqa deńgeıine, jańa jaǵdaıǵa ótemiz - Arzyqulov
«Qazaqstan Respýblıkasynyń Prezıdenti Qasym-Jomart Toqaev búgingi málimdemesinde 11 mamyr kúni tótenshe jaǵdaıdyń aıaqtalatynyn jarııa etti. Alaıda indettiń taralý qarqynyna baılanysty óńirlerdegi karantındik sharalar jalǵasyp, jaǵdaıdyń túzelýine qaraı alynyp tastalady. Qazaqstannyń álem elderi arasynda alǵashqylardyń biri bolyp pandemııaǵa qarsy tótenshe jaǵdaı rejımin engizýi vırýstyń baqylaýsyz taralýyna jol bermeı, jaǵdaıdy turaqtandyrýǵa múmkindik berdi. Álemniń basqa elderimen salystyrǵanda Qazaqstandaǵy vırýs juqtyrǵandar men indettiń qurbany bolǵandardyń sany aıtarlyqtaı tómen bolýy da sonyń aıqyn dáleli, ýaqtyly qabyldanǵan sharalar men medıtsına salasy ókilderiniń eren eńbeginiń jemisi», - dedi Almas Arzyqulov.
Ol Prezıdent tapsyrmasy boıynsha Úkimet pen Ulttyq bank ekonomıkalyq damýdy qalpyna keltirý jónindegi keshendi jospar ázirlep jatqanyn aıtty.
«Elimizdegi pandemııaǵa qatysty jaǵdaıdyń turaqtanýyn eskere otyryp, Prezıdent aldaǵy ýaqytta ulttyq ekonomıkany jandandyrý qajettigin erekshe atap ótti. Prezıdent tapsyrmasymen Úkimet pen Ulttyq bank daıarlaǵan ekonomıkalyq damýdy qalpyna keltirý jónindegi keshendi jospardy ázirlep jatyr. Josparda ulttyq ekonomıkada oryn alǵan túbegeıli ózgerister jaǵdaıynda ony basqarýdyń ınstıtýtsıonaldyq jáne qurylymdyq reformalary eskeriletin bolady. Keıbir sharalardy Prezıdent búgin atap ótti.
Koronavırýs indetinen týyndaǵan kúrdeli kezeń elimizdiń ekonomıkasynyń osal tustardy ańǵartty. Álemdik ekonomıkanyń daǵdarysymen qatar elimizde de kóptegen kásiporyndar men bıznestiń jumysy toqtap, jumyssyzdyq oryn aldy. Jańa jaǵdaıda jumyspen qamtamasyz etý jáne ekonomıkalyq tıimdilikti arttyrý úshin ekonomıkany ártaraptandyrý úderisin jalǵastyryp, shaǵyn jáne orta bızneske barynsha jaǵdaı jasaý qajet. Sonymen qatar adamı kapıtaldy damytyp, ultymyzdy básekege qabilettilik deńgeıine kóterý qajet. Osyǵan oraı aldymyzda bilim, ǵylym, densaýlyq saqtaý salalaryn da túbegeıli jańǵyrtý, saıası reformalar júrgizý mindeti tur», - dedi Almas Arzyqulov.
Onyń aıtýynsha, álemdi jaılaǵan indetten keıin elimiz damýdyń múldem basqa deńgeıine ótip, álemmen qatar jańa jaǵdaıda ómir súretinimiz bárimizge aıqyn bolyp otyr.
«El aldynda ekonomıkaǵa jáne memlekettik basqarý júıesine aýqymdy ári mańyzdy ózgerister engizý mindeti tur. Biz álemdik deńgeıdegi «jasyl energetıka» jáne sandyq tehnologııalarǵa ótý úderisinen shet qalmaı, olardy óz ekonomıkamyz ben qoǵamymyzdyń qajetine jaratýymyz kerek. Bul mindetti atqarýǵa árbir qazaqstandyq óz úlesin qosa alady. Ol úshin kúndelikti ómirde qajetti sanıtarlyq normalardy ustanyp, otandyq taýarlar men qyzmet túrlerin tutynýǵa umtylyp, ishki týrızmge artyqshylyq berip, múmkindik bar jaǵdaıda osal toptarǵa qol ushyn sozýymyz qajet», - dedi Almas Arzyqulov.
Onyń aıtýynsha, daǵdarystan tıisti sabaq alyp, qatelikterdi eskere otyryp, damý úshin jańa serpilis ala bilgen elder ǵana qatardyń aldy bolýǵa qabiletti.
«Ol úshin tutas memleket, biregeı el bolyp, árbirimiz aıanbaı óz úlesimizdi qosýymyz kerek», - dedi Almas Arzyqulov.