Pandemııadan beri áleýmettik jeli qoldanýshylarynyń sany 1 mlrd astam adamǵa artty - mınıstrlik

ASTANA. QazAqparat – Pandemııa bastalǵannan beri áleýmettik jelilerdiń jalpy aýdıtorııasy shamamen 30%-ǵa ósti. Bul týraly «Ashyq» NQA portalynda jarııalanǵan «Internet-jarnama jáne onlaın-platformalar týraly» Zań jobasyna qosymsha konsýltatıvtik qujatynda jazylǵan, dep habarlaıdy QazAqparat tilshisi.

«Jyl saıyn ınternettegi jarnamaǵa álemdik shyǵyndar orta eseppen 15%-ǵa ósip keledi. 2021 jyldyń qorytyndysy boıynsha ınternet jelisinde ilgeriletýge 491,7 mlrd dollar baǵyttaldy. Bul – ósimniń tarıhı maksımýmy. Ásirese, pandemııa bastalǵannan beri áleýmettik jelilerdiń jalpy aýdıtorııasy shamamen 30%-ǵa ósti, ıaǵnı keıingi 3 jylda 1 mıllıardtan astam jańa paıdalanýshy qosyldy. Jyl saıyn áleýmettik jelilerde ótkiziletin ýaqyttyń uzaqtyǵy, sondaı-aq osy maqsattar úshin uıaly telefondy paıdalaný artady. Qazaqstan da budan shet qalmaıdy jáne ınternettiń otandyq segmentinde barlyq negizgi kórsetkishtiń ósýi baıqalady. Mysaly, Strategııalyq josparlaý jáne reformalar agenttiginiń derekteri boıynsha, 2021 jyly 4 jastan 76 jasqa deıingi ınternet jelisin paıdalanýshylar sany el halqynyń jalpy sanynyń 92,9%-y boldy», - delingen «Ashyq» NQA portalynda jarııalanǵan konsýltatıvtik qujatta.

Qoldanýshylar sany kóbeıgen saıyn, alaıaqtyq qylmystar jıileıdi. Sondyqtan, Aqparat jáne qoǵamdyq damý mınıstrligi birqatar jańa normany engize otyryp, qazaqstandyqtardyń quqyqtary men bostandyqtaryn qorǵaý qajet dep sanaıdy. Ol úshin ınternettegi jarnama men platformalardyń qyzmetin retteıtin jańa zań ázirleý usynyp otyr.