Pandemııada naqty sektor básekege qabiletti ekenin kórsetti – Premer-Mınıstr

NUR-SULTAN. QazAqparat – 2021 jyldyń birinshi jartyjyldyǵynda memlekettik bıýdjet kiristeri jospary 107,5% oryndaldy. Bul týraly QR Premer-Mınıstri Asqar Mamın Úkimettiń keńeıtilgen otyrysynda aıtty, dep habarlaıdy QazAqparat tilshisi.

«2021 jyldyń birinshi jarty jyldyǵynda memlekettik bıýdjet kiristeri josparǵa qatysty 107,5% oryndaldy. Al respýblıkalyq bıýdjet kiristeri 101%, jergilikti bıýdjetter 120,3% oryndaldy. Memlekettik bıýdjet shyǵystary josparǵa qatysty 99,6% oryndaldy», - dep atap ótti Premer-Mınıstr.

Onyń aıtýynsha, respýblıkalyq bıýdjet shyǵystary 99,9%, al jergilikti bıýdjetter – 99,6% oryndaldy.

«Pandemııa jaǵdaıynda naqty sektor ekonomıkanyń turaqtylyq faktoryna aınalyp, óziniń básekege qabiletti ekenin kórsetti. Óńdeýshi sektordyń 5,6% óskeniniń arqasynda ónerkásiptiń oń ósý qarqyny 1,5% deńgeıinde qamtamasyz etilýde. Farmatsevtıkalyq ónim 31,1%, mashına jasaý 22,1%, onyń ishinde avtomobıl jasaý 32%, vagondar men lokomotıvter 37,5%, qurylys materıaldary 19,5%, kıim 19,5% jáne jıhaz óndirisinde 19% deńgeıinde serpindi ósý qamtamasyz etildi», - deıdi A. Mamın.

Sonymen birge, OPEK plıýs kelisimi boıynsha mindettemelerdi oryndaý aıasynda munaı óndirýdiń 5,3% qysqarýyna baılanysty taý-ken óndirý ónerkásibindegi serpinniń 3% shektelýi baıqalady.

«2004 jyldan beri alǵashqy ret ekonomıka qurylymyndaǵy óńdeýshi ónerkásip úlesi taý-ken óndirý ónerkásibinen asyp tústi. Qurylys sektorynda joǵary kórsetkishterge qol jetkizdik. Jartyjyldyq qorytyndysy boıynsha ósý 11,9% boldy. 6,6 mln sharshy metr turǵyn úı paıdalanýǵa berildi, bul byltyrǵy jyldyń osyndaı kezeńimen salystyrǵanda 8,3% joǵary. Aýyl sharýashylyǵyndaǵy 3,2% deńgeıindegi ósim, mal sharýashylyǵyndaǵy óndiris kólemin 3,4% ulǵaıtý esebinen bolyp otyr», - dedi Asqar Mamın.

Aıta keteıik, Memleket basshysy Qasym-Jomart Toqaevtyń tóraǵalymen Úkimettiń keńeıtilgen otyrysy bastaldy. Beınebaılanys rejıminde ótip jatqan otyrysta Mınıstrler kabınetiniń barlyq músheleri, oblystardyń, respýblıkalyq mańyzy bar Nur-Sultan, Almaty, Shymkent qalalarynyń ákimderi qatysýda. Jıyn barysynda elimizdiń bıylǵy jartyjyldyqtaǵy áleýmettik-ekonomıkalyq damýy qorytyndylanbaq. Sondaı-aq Qazaqstan Prezıdenti pandemııadan keıingi kezeńdegi ekonomıkany damytýdyń mindetterin belgilep beredi dep kútilýde.