Pandemııa telemedıtsınaǵa degen suranysty arttyrdy
Almatydaǵy Pedıatrııa jáne balalar hırýrgııasy ǵylymı ortalyǵynda jyl basynan beri telemedıtsına arqyly 714 keńes berildi, dep habarlaıdy QazAqparat tilshisi.
Ortalyq baspasóz qyzmetiniń málimetine sáıkes, Pedıatrııa jəne balalar hırýrgııasy ǵylymı ortalyǵy telemedıtsınany 2012 jyldan bastap qoldanyp keledi. Osy zamanaýı tásil arqyly elimizdiń ár túkpirindegi klınıkalar Pedıatrııa jəne balalar hırýrgııasy ǵylymı ortalyǵy mamandarynan densaýlyq jaǵdaıy aýyr balalardy emdeý boıynsha qashyqtan keńes alyp otyrady. 2019 jyly – 481 telekeńes bergen. Al 2020 jyly karantınge baılanysty onlaın rejımindegi konsýltatsııanyń sany artty. Pedıatrııa ortalyǵy dárigerleri pandemııa kezinde, ıaǵnı naýryz aıynan bastap 447 telemedıtsına protsedýrasyn ótkizip, elimizdiń ár aımaǵyndaǵy aýyr halde jatqan kishkentaı patsıentterge kómek kórsetti. Al jyl basynan beri jalpy sany - 714 telekonsýltatsııa berdi.
«Aýyr qyzmetine qaramastan, ortalyq mamandary ýaqyt taýyp, óz jumystarymen qatar respýblıkanyń ár óńirindegi áriptesterine kómek qolyn sozyp, konsýltatsııalyq keńes berdi. Munshama zor keńes berý telemedıtsına tarıhynda buryn-sońdy bolmaǵan»,– dep habarlady Pedıatrııa jáne balalar hırýrgııasy ǵylymı ortalyǵynan.
Tótenshe jaǵdaı kezinde sanıtarlyq avıatsııa boıynsha óńirlerge 665 ushý uıymdastyrylyp, kúrdeli sozylmaly aýrýlary bar 1099 balaǵa medıtsınalyq kómek kórsetildi, onyń ishinde 283 jańa týǵan náreste bar.
Budan basqa, ortalyq qyzmetkerleri respýblıka boıynsha hali aýyr barlyq balalarǵa WhatsApp chattary bıynsha turaqty monıtorıng júrgizedi.
«Elimizde COVID–19-ben baılanysty mýltıjúıeli qabyný sındromy (Kavasakıge uqsas sındrom) jaǵdaılary tirkelgen sátten bastap respýblıkalyq ortalyqtar men eldegi jetekshi joǵary oqý oryndarynan sarapshylardyń jumys toby quryldy. Olar onlaın rejımde jáne telemedıtsına boıynsha mýltıjúıeli qabyný sındromyna kúdigi bar barlyq balalardy qarap, emdeý boıynsha jetekshilik ete bastady. Sımptomdary mýltıjúıeli qabyný sındromyna keledi degen naýqas balalar boıynsha shuǵyl habarlama 10 saǵat ishinde Pedıatrııa jáne balalar hırýrgııasy ǵylymı ortalyǵyna kelip turady. Der kezinde kórsetilgen kómektiń arqasynda 40 bala aýrýynan saýyǵyp shyqty. Barlyǵy 74 balaǵa konsýltatsııalyq kómek kórsetildi. Qıyn kezeńderde de telemedıtsına arqyly medıtsınalyq kómektiń kóp balaǵa kómegi tıdi»,– dep atap ótti ortalyqtaǵylar.
Sondaı-aq, telemedıtsına baǵyty medıtsınalyq mekemelermen jáne sheteldik klınıkalarmen telekópir ótkizýge, shetel mamandarymen medıtsınalyq pikir almasýǵa múmkindik beredi. Telemedıtsına arqyly respýblıka boıynsha naýqastardy emdeý úshin konsılıýmdar jáne óńirlik dárigerlerdiń biliktiligin arttyrýǵa arnalǵan josparly telelektsııalar uıymdastyrylyp otyrady .
Telemedıtsına emdeý men dıagnostıkanyń tıimdiligin sapaly jańa deńgeıge kóterýge múmkindik beredi, bul qaraý men emdeý ýaqytynyń qysqarýy, aýrýlardyń asqynýynyń azaıýy, joǵary bilikti konsýltatıvti medıtsınalyq kómek alý, keńes berý úshin salalyq maman dárigerlerdi tartý jáne ólim-jitimdi azaıtý.