Pandemııa sanepıdem qyzmettiń aıryqsha mańyzyn aıqyndap berdi – Erjan Baıtanaev

NUR-SULTAN. QazAqparat – Jahandy jaılaǵan talaı epıdemııalardyń betin qaıtaryp, eldi aman alyp qalýda sanıtarlyq-epıdemıologııalyq qyzmettiń mańyzy óte zor. Sanıtarııalyq-epıdemıologııalyq baqylaý komıtetiniń resmı ókili Erjan Baıtanaev áleýmettik jelidegi paraqshasynda sala qyzmetkerlerin kásibı merekemen quttyqtap, oı bólisti dep habarlaıdy QazAqparat.

«Álem jurty japa shekken oba, halyqqa kesapat ákelgen tyrysqaq, dúnıeni dúr silkindirgen Ebola bar. Aty atalmaǵandary qanshama?! Qazir bulardyń biri de joq. Bul – san-epıd qyzmetiniń bilikti jumysynyń nátıjesi. Aýrý anyqtalǵan boıda epıdbrıgada qorǵanys quraldaryn saılap, aýrý oshaǵyna jedel jetip, epıdemıologııalyq zertteý júrgizedi. Naýqaspen baılanysta bolǵandardy shuǵyl anyqtap, oqshaýlaıdy. Aýrýdyń taralý tizbegin úzý, karantın sharalaryn engizý jumystaryn uıymdastyrady. Bul áreketter bir ǵana naýqasty emes, bútin bir eldi saqtap qalý úshin júrgiziledi», - dep jazady ol.

Álemdi jaılaǵan indettiń atalǵan qyzmettiń mańyzdylyǵyn kórsetkenine toqtalady.

«Pandemııa san-epıd qyzmettiń aıryqsha mańyzyn aıqyndap berdi. Keshegi lokdaýn esimizde. Memlekettik organdardyń jumysyn rettep otyrý, úılestirý, elge karantın engizý, memlekettik shekaradaǵy qozǵalys, kásipkerlerdiń jumysy, tyıym salý men ruqsat berý – barlyǵy Bas sanıtar dárigerdiń Qaýlysyna táýeldi boldy. Sál qatelesýge, múlt ketýge múldem bolmaıdy. Sebebi, árbir sheshimniń artynda adam taǵdyry, ult saýlyǵy tur. Der kezinde qabyldanǵan sheshimderdiń arqasynda epıdahýal birshama turaqtandy», - deıdi.

Sanıtarııalyq-epıdemıologııa qyzmeti jyl boıy damyl tappaıtynyn aıtady.

«Qys, kúz – tumaý men JRVI-diń, kóktem – kene entsefalıti men kene shaǵýdan zaqymdanýdyń, jaz – jedel ishek ınfektsııasy men serrozdy menıngıttiń órshıtin ýaqyty. Sondyqtan, san-epıd qyzmet 365 kún boıy ult saýlyǵy kúzetinde», - degen Erjan Baıtanaev sala qyzmetkerleriniń jaýapty jumysyna tabys tileıdi.