Pandemııa saldarynan Qazaqstanǵa keletin týrısterdiń sany 3,6 ese azaıdy

NUR-SULTAN. QazAqparat – Koronavırýs pandemııasy týrızm salasyna úlken soqqy jasady. Álemniń qaı eline bolmasyn keletin týrısterdiń sany kúrt tómendedi. Álbette, bul indetten týyndaǵan daǵdarys Qazaqstanǵa da áser etpeı qoıǵan joq, dep habarlaıdy QazAqparat tilshisi Energyprom.kz aqparat kózine silteme jasap.

2020 jyldyń birinshi toqsanynda syrtqy týrızmniń álemdik kórsetkishi aldyńǵy jylǵy kórsetkishten 28,6%-ǵa tómen boldy.

Al ekinshi toqsanda búkil álemde eń qatań karantın shekteýleri engizilgen kezde týrızm tolyqtaı toqtap, sheteldik týrısterdiń álemdik aǵyny 18,4 ese azaıdy (Qazaqstan Respýblıkasynda osy kezeńde - 16,7 ese).

Jalpy, 2020 jyly Dúnıejúzilik týrıstik uıymnyń málimetteri boıynsha sheteldik týrısterdiń álemdik aǵyny 3,8 ese quldyraǵan.

«Qazaqstanda byltyr «koronadaǵdarystyń» úsh toqsanynda (sońǵy toqsandaǵy málimet áli shyqqan joq) elge kirgen týrıster sany birden 3,6 ese azaıyp, 1,8 mln adamdy qurady. Aldyńǵy jyly elge 6,4 mln týrıst kelgen edi. Qazaqstannan shetelge shyqqan týrıster sany 2,4 mıllıon adamdy ǵana qurady. Bul 2019 jylmen salystyrǵanda 3,4 ese az», - delingen energyprom zertteýinde.

Qazaqstandaǵy qonaq úıler men kisi ornalastyratyn basqa da oryndarǵa úsh toqsanda kelýshiler sany 2,6 mıllıon adamdy qurady.

Bul aldyńǵy jylǵy kórsetkishten eki ese az. Sonymen birge sheteldik týrıster - jalpy kelýshiler sanynyń tek 7,5%-yn qurady (aldyńǵy jyly - 15,5%).

Qonaq úıler, jataqhanalar, sanatorııler jáne basqa ornalastyrý oryndarynyń sany bir jyl ishinde 3,9% -ǵa, ıaǵnı 2020 jyldyń úshinshi toqsanynyń sońynda 3,5 myńǵa deıin azaıdy.

Qazaqstanda otandyq týrızmdi damytý maqsatynda Qazakhstan Travel and Tourism Council resýrs ortalyǵy qurylǵan.

Qazirgi tańda ortalyq týrızm salasyndaǵy ınnovatsııalyq tehnologııalardy engizý máselesin pysyqtap jatyr.

Ortalyq eń aldymen týrıstik qyzmet kórsetetin bıznes ókilderine qoldaý kórsetpek.