Pandemııa kezinde KT sýretterin saraptaýǵa jasandy ıntellekt qoldanyldy

NUR-SULTAN. QazAqparat – Pandemııa kezinde kompıýterlik tomografııa sýretterin saraptaýǵa jasandy ıntellekt qoldanyldy. Bul týraly QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Asqar Jambakın aıtty, dep habarlaıdy QazAqparat tilshisi.

«Aıtalyq, pandemııa kezinde kompıýterlik tomografııa sýretterin saraptaý úshin jasandy ıntellekt qoldanyldy. Ol tıimdilikti aıtarlyqtaı arttyrýǵa, dárigerler jetispeýshiligin tómendetýge septigin tıgizdi. Qazirgi ýaqytta dál osy tehnologııa onkologııalyq aýrýlardy saraptaý úshin qoldanyla bastady. Barlyq sýretterdi saraptaý úshin jasandy ıntellektini qoldaný úshin osy júıemen barlyq medıtsınalyq mekemelerdi tolyqtaı qamtý mindeti júktelip otyr», - dedi ol «Joldaý 2021: iske asyrý joldary» taqyrybyna arnalǵan dóńgelek ústel otyrysy barysynda

Vıtse-mınıstr derekterdi tsıfrlandyrý baǵytynda da qandaı jumystar júrgizilip jatqanyn aıtty.

«Eger pıramıda retinde qaraıtyn bolsaq, baza negizi ınfraqurylym sanalady. Bul – ınternet, jańa tehnologııalardy paıdalana otyryp, derekterdi óńdeý ortalyqtarynyń jelisin qurý. Kelesi deńgeıi – memleketti bıznespen jáne azamattarmen ózara is-qımyly, sonymen qatar bıznestiń ózin tsıfrlandyrýǵa yntalandyrý. Munan keıingi deńgeı – memlekettik organdardyń, bıznestiń óz tıimdilikterin arttyrý úshin saraptamalardy qoldanýy, osylardyń bárin jınaqtaı kele atalǵan pıramıdany tsıfrlyq úkimet dep sanaýǵa bolady», - dedi Asqar Jambakın.