Pandemııa din ókilderiniń rýhanı álemin álsirete alǵan joq - Naýryzbaı qajy Taǵanuly

NUR-SULTAN. QazAqparat – Pandemııalyq jaǵdaı din ókilderiniń rýhanı álemin álsirete alǵan joq. Bul týraly álemdik jáne dástúrli dinder kóshbasshylary sezi hatshylyǵynyń HІH otyrysynda Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly aıtty, dep habarlaıdy QazAqparat tilshisi.

«Adamzat balasy sanǵasyrlyq tarıhymyzda talaı syndarly sátter men synaqtardy, zobalań zamandar men náýbetterdi bastan keship keledi. Álemdi úreılendirgen qazirgi syn sátte de Adam men Haýanyń urpaqtary qabyrǵamyzdy qaıystyrmaı, úmitsizdikke boı aldyrmaı, bir-birimizge qamqor ári tirekshi bola bilýimiz qajet. Búginde úreı qushaǵyna enip, eleń-alań kúı keshken ár adam úshin jyly sózdiń ózi janǵa daýa, kóńilge medeý bolyp tur. Bul tusta dindarlar men din lıderleriniń róli orasan zor bolyp otyr», - dedi QMDB tóraǵasy.

Bas múftı qazaq halqynda «Betege ketse – bel qalar, berekeń ketse – neń qalar?» degen ataly sóz bar ekendigin eske saldy.

«Alla elshisi aıtqandaı, jaqsy sóılep, aınaladaǵy adamdarǵa shýaq shashyp, úreıge emes, úmitke qanat bitire bilsek qana álemdik pandemııany jeńerimiz anyq. Meniń oıymsha, álemdegi pandemııalyq jaǵdaı din ókilderiniń rýhanı álemin álsirete alǵan joq. Pandemııa ýaqytynda meshitter men ǵıbadathanalar esigi jabylǵanymen, saýap esigi jabylmaıtyny sekildi, din qyzmetkerleri qoǵamda izgilik pen meıirim syndy qundylyqtardy keńinen nasıhattaı bildi», - dedi Naýryzbaı qajy Taǵanuly.